Kisah Palui Zuhud
PARIBAHASA Banjar babuihan muntung mamadahi kawan, kaluarga, anak bini, tatap kada diasinya, ampunnya saurang jua ai nang digawinya.
”Napa Lui muha ikam pina masam haja?” rawa Garbus.
“Aku jadi masam muha, masalahnya urang-urang nang kupadahi tatap kada mamakai apa jarku,” Palui sarius.
“Nang panting sudah kita padahi. Dipakainya atau kada diasinya tarsarah nang ampun diri Lui ai,” sahut Garbus.
“Kita kada usah bapapadah Lui ai, diri saurang gin kaya apakah, atau anak bini saurang di rumah, bisa bangat lagi pada urang lain,” ucap Tulamak manumpalak.
“Muntungku ne kaya binian pang, asa kada nyaman bila kada umpat managur, nang ngaran marasa bakaluarga,” Palui indah kalah.
“Lalu pang apa masalah ikam ne jadi sarius banar ya?” Tulamak handak tahu.
“Kaya ne nah, bila takumpulan di gardu atau di warungkah, aku padahi buhannya nang suka behampas buyang, jarku sadang sudah gawian behampas buyang, huban behambur. Jaka mambaca salawat atau mambaca buku agama. Pian ne tuha sudah julak ai. Bailuran aku mamadahi , tapi sidin tatap bedumlah atau behampas buyang. Urang azan salat asar, nyata kada salat,” Palui mangisahakan bubuhan panduman.
“Banyak ai kalu Lui, artinya kada sidin haja nang bedumlah?” takun Garbus.
“Iya am, ganarasi anum ada, ganarasi tuha mahuluakan,” ujar Palui sangkal.
Imbah nitu Palui bulik ka rumah. “Asa kada hingkat lagi nah hidup di zaman damini, labih baik zuhud haja,” Palui gagarunum.
“Lakasi ja ulun manjuhut. Bawudu dulu pian salat Isya sampai sudah,” nang bini manjuhut tangan Palui.
“Nah ikam salah paham. Lainnya manjuhut tanganku pang. Jarku zuhud, artinya handak measingkan diri matan hiruk-pikuk dunia. Aku handak saurangan haja di kamar. Kada sanggup lagi malihat dunia luar panuh kemaksiatan, fitnah, ambisius, korupsi duit, korupsi waktu, suguk-manyuguk, makan riba, besaung ayam, pelecehan seksual, keranjingan narkoba, wan lain-lain kada katangatan lagi, digawi urang tarus,” Palui nyaring basuara.
Nang bini lakas bajauh malihat lakinya sarik wan matanya manciling-ciling.
Palui badiam di kamar sing lawasan.
“Uh abahnya sadang sudah barkhalwat di kamar, balum basalat Isya kalu?” katuk lawang kamar ulih nang bini.
“Uh bujurlah umanya. Pukul 12 malam sudah,aku taguring janak sakalinya,” Palui mamusut ka mata, lakas ka pambanyuan maambil banyu wudu.
