Kisah Palui Umpat Kai Nini
BANYAK masalah nang mahinggapi kakanakan sakulahan wayah ne marga mama abahnya sarak. Jadi nang maharagu bubuhannya adalah paninian atau kai.
”Lui, Undo, siswa ikam bamasalah?” rawa guru BP (bimbingan panyuluhan) ka Palui nang jadi wali kalasnya.
“Ubui-ubui nah, rancak banar sudah Undo dikiau ibu BP” sahut Palui pina takulibi.
“Napa pulang masalahnya bu?” takun Garbus paman sakulahan.
“Bapacaran Lui ai, Bus ai, wan Jumi kalas 8 A, “ sahut ibu BP.
“Oh dasar bungas si Undo, makanya payu” ujar Palui sang sadikit lihum.
“Kita panggil haja nah urang tuha Undo ne Pak Palui lah?” saran ibu BP.
“Aku bu ai katuju banar,” ujar Palui manyahuti.
Maka disurati urang tuha Undo wan urang tuha Jumi gasan manakuni kanapa bila bulikan sakulah wan ampahan sakulah kaduanya bagandeng tangan di sapida mutur.
Isuknya nang datang paninian Undo wan kai Jumi.
”Nah mana mamanya Undo ni?” rawa Palui.
“Mama abahnya Undo sudah lawas basarakan. Abahnya madam babini lagi. Nang mamanya balaki jua. Jadi Undo ditinggalnya wan aku,” kisah Nini Undo.
“Pian pang baapa wan Jumi?” takun ibu BP ka urang tuha dari pihak Jumi
“Aku te kainya, ibu BP ai,” sahut sidin.
“Kamana abah mamanya?” takun Palui.
“Abahnya Jumi maninggal dunia, nang mama jadi TKW di Arab sana. Jadi Jumi umpat wan aku,” ujar sidin marista.
“Han kaya apa ni wan kai Jumi?” Palui asa pusang.
“Maklum aku tuha Pak Palui ai, jadi kada tapi kawa maawasi lagi. Mata kaur sudah,” ujar nini Undo.
Imbah nitu baucap kai Jumi. ”Aku kada hingkat lagi bausaha, kacuali dapat kiriman mamanya Jumi,” ujar kai Jumi sadih.
“Nah Jumi wan Undo, tahu kalu kesah nini wan kai ikam. Kaya apa ikam handak dikawinakankah?” tagas ibu BP.
“Ampuun bu?” sahut Jumi.
“Ampuuun bu…,” sahut Undo jua.
“Kalu kaya nitu kita kawinakan haja nini wan kai” saran Palui.
“Asyik Pak Palui ai, nyaman ulun sarumah wan Undo?” sahut Jumi pina himung.
“Bah iya pang Jumi nih, dasar gatal jua,” tiwas ibu BP.
Ibu BP lalu maingatakan samunyaan ini marga abah amam sarak, anak kada taparhatiakan. Ibu BP jua manasihati Undo wan Jumi. Imbah itu bubuhannya katawaan handak manjodohakan kai Jumi wan Nini Undo.
“Uh raminya, buhannya nah di ruangan BP?” Garbus mandapati ka buhannya di ruang BP.
“Nah, kita bubar sudah, kena pulang kita panderakan” ujar ibu BP lakas Palui sakalinya wan nang lainnya kaluaran.
