Kisah Palui dan Ubat Kurus
Hari–hari panderan Tulamak kada lain sual makanan haja. Rupanya mauk si Garbus mandangar maka ditagurnya ai.
“Makanan itu tamasuk syarat hidup Bus ai,” jawab Tulamak.
“Ooo… jadi ikam ini mamilih hidup untuk makan karna gawiannya hari-hari makanaaan… tarus. Padahal nang pas Mak ai adalah makan untuk hidup, artinya banyak nang digawi selain makan. Ikam ingat kalu Mak ceramah guru di masigit bahwa kalu hidup hanya untuk makan adalah sapi,” ujar Garbus.
“Hi’ih aku paham haja Bus ai, tapi guru itu ada baucap bahwa janganlah manulak razaki, makanya makanan itu kuanggap razaki nang harus dinikmati. Bila kada dimakan ba-arti mubazir,” sahut Tulamak.
“Karna ikam katuju makan, apalagi nang balamak lamak maka kusaranakan baiknya ikam bapikir jua untuk bapariksa ka puskesmas. Ungkusnya murah haja apalagi bila ikam kawa mausahakan surat miskin,” ujar Garbus.
“Ikam jangan mahina aku Bus ai, mamadakahan aku miskin. Kalu parlu aku bapariksa ka dukter ahli nang spesialis, kada cuma ka puskesmas, dan ubatnya kuminta
nang larang ulahan luar nageri,” sahut Tulamak bakaras karna marasa dihina.
“Napa dipanderakan Mak, pina ada tasambat-sambat dukter spesialis? Baubat di dukter ahli spesialis itu larang Mak ai, ungkusnya dua kali atawa tiga kali dukter umum,” ujar Palui.
“Kanapa maka larang Lui, padahal gawian dukter itu tamasuk layanan umum, manulung sesama umat,” ujar Garbus.
“Dukter ahli spesialis itu sakulahnya lawas dan banyak banar mangaluarakan biayanya. Makanya wayah ba-praktek itulah harus mambulikakan mudal,” ujar Palui pina saraba tahu.
“Kalu kaya itu napa ubatnya gasan mangurusakan awak lamak ini Lui?” ujar Tulamak baubah pikiran kada jadi ka dukter ahli karna mandangar ungkusnya larang.
“Ubatnya nyaman banar Mak ai asal ikam hakun dan badisiplin manggawinya,”
ujar Palui.
“Sambatakan Lui napa ubatnya?” ujar Tulamak manggamati.
“Ubatnya adalah ‘manggelengakan kapala’, dalam dua minggu insya Allah bakurus,” ujar Palui lihum.
“ Manggelengakan kapala? Anih bin ajaib. Ubat mangurusakan awak adalah menggeleng-gelengakan kapala?” uja Garbus pina mangaramputakan.
“Insya Allah bisa, artinya satiap urang manawari atawa mambawai makan atawa nginuman, maka ikam manggelengakan kapala sebagai tanda kada hakun. Naahhhh… bila sampai dua minggu ikam kada hakun dibawai makan nginum, pasti dan pasti awak ikam cagar bakurus,” ujar Palui mambari nasihat.
