Kisah Palui Tapahurup Sandal
Minggu lalu Palui lawan bibinya ada acara di kampungnya. Palui mahadiri urang batasmiah, bininya mahadiri rapat bubuhan bibinian nang handak mambantuk kumpulan ibu-ibu dasa wisma.
Palui wan bininya tatap tulak baimbai. Padahal, batasmiah imbah Magrib, sadangkan rapat bibinian imbah Isya.
Acara batasmiah cucu Haji Duraba banyak dihadiri ulih kakawalan bibiniannya, jadi rami banar bubuhannya bahuhulutan apalagi nang hadir sapakawanan Palui, Garbus, Tulamak, Tuhirang lawan si Undap alias Endek.
“Kami sapakawanan minta maaf lawan pa haji karna malam ini kami mambujang baratan,” ujar Palui.
Karna nyaring, panderan bubuhan Palui itu kadangaran bubuhan bibinian kakawanan anak Haji Duraba. “Bubuhan Palui singhaja kada mambawai bini, inya malihat kami datangan manyarang batasmiah ini,” ujar Habibah lawan Sarah, si balu kambang.
Mandangar itu, bubuhan kakawan Palui lalu kalambisitan. “Kalu kaya itu pas haja acara kita malam ini tapisah lawan bubuhan umanya,” ujar Garbus.
Imbah tuntung acara, Palui langsung bulik ka rumah, hari pina hujan garimis inya kadinginan lalu langsung guring kauyuhan. Kada lawas datang bininya, tapi kada kawa masuk karna lawang bakunci matan dalam. Bini Palui lalu menyintari ka hulu ka hilir, lalu tasintar ada sandal bibinian di muhara lawang.
“Nah… pantas haja kada mambukai lawang, lawas digandah pura-pura kada mandangar haja,” ujar bininya manggarunum. Lalu dikiyaunya banyaring sambil manggandah pulang ka lawang, tapi kadada jua sahutan. “Ini gawian lalakian bila kada dikawali pasti ada-ada haja parigalnya. Ini maka am, pukuknya kupangkung ikam,” ujarnya pulang gagarunum saurangan.
Mandangar gadagur-gadagur akhirnya Palui tabangun lalu langsung mambukai lawang, sambil baucap; “Kanapa bulik saurangan kadadakah nang maatarakan….”
Balum lagi Palui tuntung baucap langsung bininya mamukul lawan sandal bibinian nang ada di muhara lawang tadi. “Ayu, jangan bakaramput, siapa nang ikam bawa ka sini, mantang-mantang aku talambat bulik lalu wani mambawa bibinian ka rumah. Ayu, mana urangnya, kuhukumakan ikam badadua,” ujar bininya makin mahahing kasasarikan.
“Sabar, sabar….” ujar Palui.
Kada lawas, datang anak Haji Duraba. Inya manakunakan, adakah Palui tabawa sandal umanya, mungkin tapahurup wayah bulikan tadi.
“Ini mungkin sandal pakacil Palui,” ujar anak Haji Duraba malihatakan bungkusan sandal Palui.
“Naaaaaaahh… umanya, ini bukti. Hianatlah aku lawan ikam. Ikam ini biniku dunia akhirat,” ujar Palui sambil maharit kasakitan kana pukul.
Bini Palui minta maaf sambil mancium tangan lakinya.
