Kisah Palui dan Talu Biji Durian
Tahun ini musim buah pina basambung tarus. Baluman habis musim durian muncul pulang rambutan, lalu tiwadak imbah itu disambung buah kapul wan langsat. Tapi satangah bulan ini pinanya sudah mulai muncul buah pampakin. Ujar urang bila buah pampakin sudah mulai dijual urang, baarti handak habis lah musim buah durian.
Satumat lagi cagar habis musim durian Bus ai. Cagar mahadang satahun hanyar kawa tarasani pulang, ujar Tulamak.
Kaya apa kalu kita batuturuk duit manukarnya. Manukar sabiji nang ganal lalu kita makan badua, ujar Garbus mambawai.
Kada usah nang ganal, cukup nang panangah haja. Kaina kita kabanyakan makan durian. Kalu kabanyakan makan durian babahaya, awak bisa panas dan mam pangaruhi jantung dan bisa jua jadi panyakit kolestrol, ujar Tulamak pina saraba tahu.
Hi-ih, aku paham karna awak ikam sudah lamak jadi takutan kalu batambah kolestrolnya, sahut Garbus sambil manyuruh mulai mamakan durian yang sudah dikuyak Tulamak.
Aku kada tahan Bus ai, aku bakalah, hanya kawa mamakan dua bigi haja, rasanya mangit banar, ujar Tulamak manyarah manyuruh Garbus mahabisakannya. Imbah tuntung mamakan durian itu, Garbus wan Tulamak batamuan wan Palui.
Bubuhan ikam ini talanjur purun kada babawaan mamakan durian. Kada usah bakaramput Mak ai, aku mancium haja baunya, ujar Palui manyindir.
Tadi ikam kami cari tapi balum cangul maka tapaksa kami tinggalakan. Si Tulamak kawal kita ini tadi habis dua bigi, ujar Garbus.
Kalu cuma dua atawa talu biji, keciilll…Bus ai, ujar Palui mamahapak Tulamak. Kalu Garbus atawa Tulamak cuma sanggup sabiji atau dua biji maka aku sanggup labih dari itu, sanggup sampai talu atawa ampat biji. Ayu iringi aku, saksiakan kita bakukuatan mamakan durian, ujar Palui baagak lalu manukar ampat bigi durian dan langsung mamakannya.
Sabiji… sudah habis, dua biji… habis jua dan ini nang katalu biji, ujar Palui pina manggah dan babuih-buih muntungnya. Lalu kada lawas inya lintuk kauyuhan, rabah kakanyangan.
Palui ini kada cuma kauyuhan Mak ai, tapi inya siup. Ayu lakasi kita bawa ka puskesmas, ujar Garbus bagagas mangiyau bica.
Palui ini dasar rakus Bus ai, baagak harat mamakan durian sampai talu biji mangalahakan kita. Padahal inya kita bunguli, kita cuma mamakan talu bigi isinya haja sedangkan Palui dasar luar biasa kawa mahabisakan talu biji buahnya, pantas haja siup, mudahan jangan jiun, ujar Tulamak wan Garbus taumpat sadih.
