Kisah Palui Tabuat Walut
Kalu mamander sual hubi, bubuhan Palui wan kakawalannya itu baisian hubi atawa kasanangan masing-masing. Ada nang hubi guring, ada jua nang hubi batungap alias katuju bamamakan wan ada jua nang katuju mahintip bibinian mandi. Tapi ada sabuting kasamaannya yaitu bubuhannya itu sama-sama baisian hubi maunjun iwak. Bila sudah tulakan maunjun bisa kada ingat di anak-bini nang mahadang di rumah. Tulak basubuhan hari tapi buliknya pasti limbah magrib.
“Gawian maunjun itu tamasuk untung-untungan Mak ai” ujar Garbus mamulai pander.
“Ku-kira kada cuma untung-untungan tapi tagantung ka-ahlian” Tulamak.
“Biarpun sudah ahli maunjun tapi bila iwaknya lagi kanyang pasti kada mamatuk, jadi untung-untungan ngarannya” ujar Garbus.
“Makanya maunjun itu harus ada hitungannya, umpamanya harus wayah iwak lapar, wayah baisukan wan wayah hujan rintik-rintik” ujar Tulamak.
“Kanapa maka harus wayah hujan rintik-rintik Mak?” ujar Garbus kada paham alasan Tulamak.
“Kanapa harus wayah hujan rintik-rintik adalah karna iwak takutan kalu pina hujan labat, banyu ba’ah wan inya kada kawa lagi bacari makanan” ujar Tulamak.
“Walaupun alasan ikam itu adalah alasan dikajal tapi aku parcaya haja karna wayah rintik-rintik itu iwak bausaha timbul wan manjinguk kaparmukaan banyu wayah itulah unjun kita dipatuknya” ujar Garbus.
“Napa pina rami mamanderakan kisah maunjun Bus? Kalu sual maunjun itu sabujurnya tagantung razaki” ujar Palui nang hanyar datang umpat batakun.
“Karna sual razaki itulah maka samalam ikam banyak dapat iwak kalacingan wan babarapa ikung walut, hanya gara-gara lukah bungkas dimasuki bidawang“ ujar Garbus manyindir.
“Bubuhan ikam jangan maanggap remeh iwak walut itu karna walut banyak pitamin wan gizinya” ujar Palui.
“Aku nang hiran kanapa maka ikam sampai kawa manangkap walut padahal walut tamasuk licin lawan ngalih ditangkap” ujar Tulamak.
“Samalam sudah kupadahakan bahwa lukahku bungkas wan aku tapaksa manggalau iwak batapih karna kadada baisian tangguk. Karna wan tapih itulah maka aku banyak mandapat anak iwak wan iwak saluang.
Aku bingung wan hiran jua kanapa maka taumpat walut itu. Eeeeee……… rupanya wayah itu walut paharatan mangaluar matan luangnya lalu taumpat jua masuk katapihku” ujar Palui.
“Wayah ikam manangguk iwak itu, ikam pacullah tapih ikam” ujar Garbus.
“Karna dalam banyu maka tapih kupacul lalu kujadiakan tangguk” ujar Palui.
“Ikam basalawar dalamlah?” ujar Tulamak.
“Kabulujuran aku kada basalawar dalam wan tapaksa batilanjang” ujar Palui.
“Hahahaaa…….. hahahaaa” ujar Garbus. “Karna ikam batilanjang itulah maka walut mangaluar mamaraki ikam. Dikiranya barang ikam adalah kawannya lalu diparakinya, karna sama-sama pina mawalut” ujar Garbus mahuhulut Palui.
