Kisah Si Palui dan Sesuatu Di Bawah Bantal
DALAM rangka manggalakkan manabung di kalangan palajar, maka di sakulahan Palui saluruh guru wali kalas manyuruh anak murid manabung wan wali kalas masing-masing.
”Ulun manabung Pak Palui,” ujar murid nang bangaran Jani.
“Ulun manabung jua Pak Palui,” ujar murid nang lain si Marni.
Pukuknya saluruh kalas 7 b nang Palui wali kalasnya samuaan manabung, walaupun tiap hari murid kada sama kada jadi masalah, ada nang Rp 2 ribu, Rp 4 ribu, sampai ada nang Rp 10 ribu saikung manabungnya setiap hari.
“Banyak nah bapak baisi duit barakat tabungan buhan pian,” sambat Palui dihadapan murid-muridnya nitu.
“Pak Palui kita makan ka warung makan yuu,” ajak murid ka Palui.
“Kada kawa buhan murid lah, ni tabungan buhan ikam, kena ngalih am aku mangganti,” sahut Palui sarius.
Singkat kisah berbilang hari wan bulan akhirnya maski sadikit, tabungan murid, sakalinya dihitung-hitung labih Rp 5 jutaan.
”Pak Palui kami handak maambil duit nah,” ujar Jani wan kakawalannya nang lain jua handak maambil.
“Ubui lah, handak maambil duit baluman banaikan lagi,” Palui bakilah.
“Kami parlu banar duit Pak Palui, disuruh abah mama gasan ada nang ditukar,” sahut kakanakannya.
