Kisah Si Palui Bedah Rumah
Palui ini sabagai wali kalas di sakulah tamasuk urang nang bijaksana, panyayang wan murid, sahingga murid labih suka curhat ka Palui daripada ka ibu BP (bimbingan panyuluhan). Suatu ketika, anangis sadih anak murid Palui nang bangaran Jumiani.
”Napa maka manangis Jumi ikam?” takun Palui asa takajut.
“Abah ulun garing Pak Palui ai,” ujarnya titikan banyu mata.
“Apa diarit abah pian?” Palui sadih jua.
“Abah sudah sapuluh hari ni di rumah sakit, sidin manggah wan batuk kada mau ampih,” sesenggukan Juminya.
“Uh iya kah, kena aku mailangi,” sahut Palui.
“Umai Jumi wan Pak Palui, pina sadih banar ada apa gerang?” takun Garbus paman sakulahan.
“Ini abahnya Jumi garing di rumah sakit sapuluh hari sudah Bus ai,” sahut Palui, hinip Garbusnya.
Dalam catatan Palui si murid Jumiani ni urangnya langkar, pintar wan akhlaknya bagus banar ka guru-guru, kasihannyalah Jumi, abah pian garing? batin Palui.
Karana mandapat laporan ulih murid, Palui lanas balapor pula ka ibu BP.
”Ni ada anak murid ibu BP lah, abahnya garing sudah sapuluh hari di rumah sakit, kaya apa kita buhan guru,” ujar Palui ka ibu BP.
“Biasa te bila ada urang tuha murid nang maninggal dunia hanyar buhan guru wan murid bakumpulan duit sadikit saurang, jarang pang kalau urang tuha murid garing kita santuni,” sahut ibu BP sarius.
“Ayuja paling kada ulun haja ibu BP ai nang mailangi ka rumah sakit,” sambat Palui.
Karana guru wayahni sibuk mangajar 24 jam tatap muka, akhirnya Palui kadada kasampatan bailang ka rumah sakit mambezuk urang tuha murid nang sakit nitu.
”Uh Jumi, karana kasibukan di sakulahan aku mambari duit haja gasan sadikit mambantu abah ikam nang sakit nitu,” ujar Palui manjurung saratus ribu ka Jumi, himung Juminya.
Babarapa hari kemudian, ada habar matan Jumi bahwa abahnya maninggal dunia. Tumbur di sakulahan murid-murid mangaedarakan celengan gasan mambantu abah Jumi nang maninggal dunia nitu.
Titikan banyu mata Palui malihat kagigihan Jumi wan mamanya sarta ading-adingnya nang barjuang gasan hidup maski rumah urang tuha Jumi kada layak huni. Abahnya baisi anak lima ikung, Jumi nomor dua, ada lagi kakaknya sudah tamat sakulah SMP. Gawian nang abah maambil upah batanam banih atau ujar urang bahuma wan gawian serabutan lainnya, sadangkan mamanya haur bahimpu anak haja, kadada waktu lagi handak bausaha.
”Mudahan pian Jumi lah wan mamanya Jumi sarta ading-ading, sabar wan tabah mahadapi cubaan ni,” hibur Palui sambil manjurung duit sumbangan matan murid wan guru.
“Kami tarima kasih banar Pak Palui ai nah, dibantu wan diperhatiakan banar ulih murid wan buhan guru,” ucap mama Jumi sambil titikan banyu mata haru. Juminya sadih banar jua.
“Ayuja mudahan Jumi jadi urang nang labih pintar kedepannya mama Jumi lah,” ibu BP nang langkar mambari nasihat ka Jumi wan mamanya.
Bulikan pada rumah abah Jumi nitu, Palui gagarunum ka ibu BP.
”Jaka diumpatakan program bedah rumah, napa rumah abah Jumi nitu kada layak huni lagi didiamimya, mana lima ikung anak sidin. Ubui lah, jaka dibedah lakasi nah, mana pambakalnya, mana!”Palui dasar kaya urang bakuriak garigitan banar malihat rumah kada layak huni nitu.
Han jarku masih banyak saudara kita nang hidupnya kurang beruntung, tapi mereka punya semangat nang tinggi dalam mangarungi lautan kahidupan di dunia naya.
