Sasuai Parmintaan Palui
Wayah pakulihan maujek sasar hari sasar badikit, karna wayah ini urang sudah banyak ujek online. Maka Palui mulai mamikirakan bagawi nang lain.
Tuhuk inya mamikirakan gawian napa nang cucuk, akhirnya tatamu jua, rupanya gawiannya itu kada jauh-jauh matan sapida mutur jua. Inya bapikir handak mancuba mambuka bengkel sapida mutur.
“Nyaman disambat tapi ngalih digawi Lui ai karna ikam kadada baisi kabisaan lain salain maujek,” ujar Tulamak.
“Ilmu kawa dipalajari Mak ai, misalnya umpat kursus mambengkel. Nang panting dicubai dahulu Mak ai. Napa haja kada bisa digawi kalu kada dicuba. Bila sudah dicuba hanyar tahu bujur atawa salahnya,” ujar Palui.
Imbah tuntung kursus, Palui langsung mambuka bengkel sapida mutur. Tanyata banyak jua urang nang datang minta baikiakan sapida muturnya, kaya manyatil gas, mambaiki rem, mangganti busi, mambarasihi kalbulator, manyatil lampu, macam-macamlah.
Kada lawas datang si Garbus manuntun sapida muturnya ka bengkel Palui, karna masinnya kada mau hidup.
“Tulunglah Lui, pariksaakan masinnya, kalu pina kada mau hidup, bisa haja bungkarakan, turunakan masinnya,” ujar Garbus.
“Supaya nyaman maujek Bus ai, jangan manukar sapida mutur nang sudah tuha ini dan kalu ikam minta tulang pariksaakan dan bungkarakan masinnya, insya Allah kaina kugawiakan,” ujar Palui.
“Kawalah tuntung kamarian ini supaya aku kawa maujek malam kaina,” ujar Garbus.
“Hari ini aku banyak gawian Bus ai, isuk haja” ujar Palui.
Kamarian isuknya Tulamak mangincang datang ka bengkel Palui sasuai janji handak maambil sapida mutur nang dibaiki Palui.
“Mudahan sapida muturku tuntung wan hari ini kada hujan, nyaman aku maujek Lui ai,” ujar Garbus.
“Tuntunglah Lui, sasuai janji ikam samalam?” ujar Garbus pina maggasak.
“Itu nah… lihati di higa rumahku, sudah kugawiakan sasuai kahandak wan parmintaan ikam samalam,” ujar Palui manunjuk ka higa gudangnya.
“Mana sapida muturnya Lui?” ujar Garbus.
“Itu nah… awak sapida muturnya basandar dan paralatannya kukumpulakan dalam kutak supaya underdilnya jangan ada nang hilang,” ujar Palui manunjuk kutaknya.
“Kanapa Lui… kanapa Lui maka pina bapaculan masinnya, barakai sama sakali,” ujar Garbus tahiran-hiran.
“Aku bagawi sasuai wan parmintaan ikam samalam, minta lihatiakan makanya sudah kulihati, lalu ikam minta turunakan masinnya maka langsung haja kubungkarakan sasuai parmintaan ikam itu. Ikam kadada minta pasangakan wan baikiakan. Makanya kugawi sasuai parmintaan ikam itu haja” ujar Palui lihum.
“Astagfirullah, dasar ikam ini bujur harus wan bautak nyiur gumpa Lui ai. Kalu masinnya bahamburan kaya ini kaya apa aku handak maujek, kaya apa aku handak bacari Lui?” ujar Garbus tapakalah banar hanya gara-gara pasannya kada langkap.
