isah Palui Salah Angin
Hari Ahad samalam Palui dua laki bini dapat undangan di kampung subarang, sakitar ampat kilu matan wadahnya badiam. Tapi wayah handak tulak sakalinya bininya bapadah kada kawa umpat saruan, padahal nang bakawinan itu adalah papatuhan bininya.
Ulun banyak gawian handak manjamur banih, hari pina panas, ujar bini Palui.
Kawa haja ditunda, isuk hari masih panas jua, ujar Palui.
Wayah ini kada kawa ditangguh, dikira panas sakalinya hujan, dikira handak hujan sakalinya panas, ujar bini Palui.
Ikam ihlas hajalah aku saruan saurangan, ujar Palui.
Ayu ja ulun parcaya haja, kada camburu karna nang kawin itu bakas gandak sampiyan jua, ujar bininya ihlas tapi manyindir.
Imbah babengkeng-bengkeng Palui bagamat maulur sapida lalu tulak saurangan handak saruan. Balum sampai di simpang tiga inya dikiyau Tulamak.
Lui, ui Palui bamandak satumat, ujar Tulamak.
Kanapa maka ikam manyaurangan Mak? ujar Palui.
Sama haja ikam manyaurangan jua, sahut Tulamak.
Kanapa maka bajalan batis, mana sapida Mak, ujar Palui.
Tapaksa bajalan batis karna sapidaku bannya miris. Mulai tadi mahadang bica kadada liwat, ujar Tulamak.
Kalu kaya itu ayu babuat kasapidaku, ujar Palui manyuruh. Palui bagamat mangayuh sapidanya karna barat mambawa Tulamak.
Jangan baguyang Mak dan marapat sadikit lalu baingkut ka pinggangku supaya sapida kada tajunggat, ujar Palui pina kabaratan.
Awakku ringan haja Lui ai, apalagi aku balum makan. Kaina imbah saruan dan wayah bulikan hanyar barat, ujar Tulamak tatawa.
Wayah Palui Tulamak bapapaderan sapanjang jalan itu, lalu kadangaran bunyi pina mamparucus cuussss… cuussss.. lalu sapidanya tamandak dan langsung tajalupuk.
Miris, miris ban dalamnya Mak ai, dan kulikarnya talipat kabaratan mambawa ikam, ujar Palui sambil mamicik ban dan mamusut kulikarnya nang talipat kaya angka dalapan.
Ampun maaf, kada salahku Lui ai, karna ikamlah nang mambawai aku mambunceng, ujar Tulamak.
Hiih, nang salah adalah kulikar sapidaku, ujar Palui.
Sabujurnya kulikar sapidapun kada salah, ujar Tulamak.
Kanapa maka kulikar sapida kada salah, kalu sudah jelas-jelas kulikar talipat kaya angka dalapan ini? Lalu napanya nang salah Mak, ujar Palui.
Nang salah adalah angin ban dalam-nya kanapa maka miris. Saandainya ban dalam kada miris pasti kulikar itu masih kawa haja manahan kita badua, ujar Tulamak.
Hiih-lah, angin itu dasar kuat Mak ai. Karna anginlah maka kita sakit parut, ujar Palui pasrah haja sambil manapuk- napuk parutnya masuk angin karna kada jadi saruan.
