Wayah ini Palui bilang sambung puting baruku. Nang dahulunya paling wayah baisukan sambil mangupi atawa paling baruku imbah tuntung makan. Tapi wayah ini bilang handak tiap manit muntungnya kada parnah kada bakukus. Mulai bangun guring baisukan, biar baluman mandi atawa bagusuk gigi, sampai handak guring malamnya.
Bininya pusang jua malihat lakinya nang bilang kada baingat baruku, kada ingat lagi wan kasihatan. Sudah jua inya managur bagamat, tapi tatap haja kada diherani ulih nang laki, dianggapnya angin lalu haja. Sampai ahirnya inya kada tahan lagi malihat kalakuan lakinya itu.
“Ini nah abahnya, lihati iklan nang ada di surat kabar ini nah. Sabarataan mamadahakan bahwa ruku dapat marusak kasihatan, dapat manyababkan kanker gangguan kahamilan wan janin,” ditambah lawan gambar macam-macam nang kaya paru-paru hirang latat akibat ruku ujar bini Palui malihatakan iklan ruku nang ada di bungkus ruku.
“Mananya umanya, mananya tulisannya?” ujar Palui maitihi.
“Ini nah, ganal banar gambar wan tulisannya,” ujar bininya manunjukakan.
“Oooo… tulisan nang ini kah?” ujar Palui unggut-unggut.
“Baca abahnya ai, baca bujur-bujur,” ujar bininya pulang.
“Ruku dapat manyababkan sakit jantung dan kanker…….,” ujar Palui mambaca wan malihati bagamat tulisan paringatan nang ada di ruku.
“Nah abahnya, masih haja kah sampiyan baruku bahimat, nang manulis paringatan ini adalah bubuhan pamarintah, bubuhan urang-urang pintar, bubuhan departemen kasihatan,” ujar bininya mahahing saking kamuarannya.
“Hadang hulu umanya… Di sini ditulis ‘Ruku DAPAT manyababkan sakit jantung dan kanker…….’ Nah kalu rukuku ini lain ruku DAPAT-an, tatapi aku manukar wan duitku saurang di warung acil Masnah.” ujar Palui baulah alasan. “Kacuali bila ada tulisannya ‘Ruku NUKAR manyababkan sakit jantung, kanker, serta gangguan kehamilan dan…” ujar Palui sambil malikit pulang ka ruku.
“Pian ini dasar pambabal abahnya ai, kada tapi cardas, kada paham bunyi iklan paringatan supaya jangan baruku, jangan marusak kasihatan saurang. kalu marusak kasihatan saurang tu sama haja badosa abahnya ai… badosa!” ujar bininya garigitan manumpalak Palui.
