PALUI laki bini kada parnah tadangar bakalahi, jangankan bakalahi barangutan muha haja kada parnah talihat. Pukuknya kalihatan harmunis tarus. Tapi kanapa kah samalam tadangar bubuhannya itu bahualan muntung sampai handak basarakan wan rupanya tadangar jua ulih kawalnya si Garbus.
“Mak.. kudangar Palui bakalahian laki bini sampai handak basarakan,” ujar Garbus.
“Haw napa panyababnya Bus?” ujar Tulamak.
“Aku kada tahu jua asal muasalnya tapi kudangar dikarnakan rambut,” ujar Garbus.
“Kanapa maka gara-gara rambut haja sampai handak basasarakan? ujar Tulamak hiran.
“Aku kada tahu jua Mak ai. Naahhh….. itu Paluinya ampah ka sini, ayu takunakan Mak?” ujar Garbus.
“Ampun maaf Lui-lah, kami dangar ikam bahual laki-bini gara-gara rambut, bujurlah Lui?” ujar Tulamak.
“Bahual atawa bakalahian laki-bini itu wajar haja, ibarat sayur kada bauyah pasti hambar rasanya. Tapi tarus tarang tatakunan ikam itu bujur haja Mak ai wan nang jadi hualnya bujur haja jua sual rambut,” ujar Palui.
“Rambut napa Lui?” ujar Garbus handak tahu.
“Ikam tahu saurang, kami sakaturunan sama sakali kadada nang barambut ikal, barambut mamak atawa rambut bagalumbang. Samunyaan rambutnya kujur lurus kaya rambut jagung,” ujar Palui.
“Lalu napa panyabab maka ikam bahualan sual rambut?” ujar Tulamak ma-anyaki.
“Wayah aku basurui samalam itu, kudapati rambut ikal-ikal tasangkut disurui. Makanya aku curiga wan sarik banar lawan biniku. pasti inya ada basalingkuh wan lalakian lain nang barambut ikal, basalingkuh sampai ka kamar paguringan,” ujar Palui pina garigitan.
“Bah, bini kurang ajar banar,” ujar Tulamak umpat sarik.
“Kaya apa ahirnya Lui, apakah sampai handak basarakan” ujar Garbus.
“Aku basabar wan baurut dada mandangarakan jawaban biniku, tarnyata rambut ikal itu lain rambut di kapala tapi rambut sisa wayah inya manyurui rambut di wadah nang lain,” ujar Palui mangalakak tatawa karna kajadiannya anih tapi nyata. (rep/emhati)
