Biar hidup di kampung, Palui wan Garbus kada kalah wan urang kuta. Bubuhannya tahu jua wan nang ngarannya kasihatan, ampat sihat lima sampurna. Tapi Garbus bingung karna kada panduitan manukar nang ampat sihat lima sampurna itu.
“Ikam jangan tapandang ampat sihat lima sampurna itu larang-larang Bus ai. Makanan nang ditukar biniku itu biasa-biasa haja yaitu lalapan, tahu tempe, gumbili wan iwak karing,” ujar Palui.
“Inja kena aku padahi biniku supaya kaya bini ikam. Itu si Tulamak datang cuba ikam takuni napa makanannya maka awaknya bulat kaya drum,” ujar Garbus manyuruh Palui.
“Mak, kami hiran jua napa pamakan ikam maka awak ikam makin hari makin baganal,” ujar Palui.
“Tapi napa muha ikam pina habang-habang,” ujar Garbus.
“Mungkin bakas diigut nyamuk, ini-nah kada cuma di muha tapi di awak habang-habang jua,” ujar Tulamak.
“Kulihat bakas igutan nyamuk ini pina mambisul, bananah. Mungkin ikam ini takana panyakit gula alias kancing manis,” ujar Palui manunjuk ka bakas luka-luka igutan nyamuk itu.
“Panyakit gula alias kancing manis itu Mak ai, kaya julak Ijai mati karna kancing manis. Luka sidin kada mau waras sampai ditatak batisnya,” ujar Garbus.
“Aku takutan Lui ai, napa ubatnya Lui?” ujar Tulamak.
“Ujar urang bahari ubat kancing manis itu adalah kumis kucing dijarang wan dinginum banyunya,” ujar Palui.
“Kalu kaya itu kaina aku bulik langsung kucuba,” ujar Tulamak. Imbah sampai di rumah Tulamak langsung manggawi. Tapi isuknya imbah manggawi itu inya langsung mancari’i Palui wan Garbus handak baadu-adu bahwa sarannya Palui itu karamput.
“Ikam pangaramput, manyakiti, manyiksa aku,” ujar Tulamak bamamai sambil sarik.
“Kanapa maka sarik, apa masalahnya?” ujar Tulamak.
“Ikam pandusta banar Lui ai, mamadahakan kumis kucing itu gasan ubat kancing manis, nyatanya muhaku makin balarah-larah, babangkak-bangkak. Wayah aku handak mancabut sisingutnya, malah aku langsung dikarukutnya,” ujar Tulamak makin sarik.
“Naahhh…….. ikam tasalah ganal Mak ai, nang kumaksud ubat kancing manis itu adalah tanaman kumis kucing, kadanya sisingut kucing nang baikung itu,” ujar Palui.
“Oooooo…….. jadi akulah nang tasalah, akulah nang kada paham,” ujar Tulamak maakui kasalahannya.
