Parut bini Palui sasar hari sasar baganal, kada karasaan sudah baumur 4 bulan labih. Malihat bininya pina uyuh batianan nang ada ini, Palui pina jimak di rumah manjagai. Rancak banar nang bini ruak-ruak handak muak.
“Kanapa umanya, masih hajakah pina rasa kada nyaman?” ujar Palui manakuni nang bini.
“Ulun rasa handak marasai salak abahnya ai,” ujar nang bini baungah.
“Ikam mangidam salak kah? ayuja kaena aku mancariakan,” ujar Palui bagagas mancari buah salak. Kada lawas Palui tulak ka pasar mancari buah salak nang dihandaki bininya. Tabarungan di tangah jalan Palui tatamu lawan Garbus wan Tulamak.
“Handak ka mana ikam Lui, pina bagagas banar?” ujar Tulamak batakun.
“Aku handak ka pasar manukar salak nah, biniku mangidam bijinya,” sahut Palui.
“Amun manurut aku ikam ka rumah Tukacil haja, inya ada bakabun salak, baik maminta haja,” ujar Garbus mamadahi.
“Bujurkah Tukacil ada bakabun salak, amun kaya itu aku ka rumahnya nah, tarima kasihlah buhannya,” ujar Palui langsung mangincang ka rumah Tukacil.
“Cil, aku minta tolongi nah, biniku mangidam biji salak, kawakah minta sabiji haja?” ujar Palui manakuni Tukacil.
“Ambil haja, ayu ja mudahan bini ikam ampih mauk jua,” ujar Tukacil. “Kasian jua ikam amun bini mangidam, kalu kada dibarii.
”Limbah dapat buah salak Palui langsung bulik, Bininya pas rahatan pina gagaruak.
“Ni umanya, biji salaknya, handak ikam taguk atawa dimamah?” ujar Palui maunjuk ka biji salak
“Pian ni talalu abahnya ai, baapa ulun disuruh managuk biji salak nangitu, ulun bujurai handak biji salak, tapi… lain biji salak nangini, biji salak ini karas, ulun handak nang talamah” ujar nang bini pina sarik-sarik tarus.
“Limbah pang biji salak napa nang lamah?” ujar Palui kada paham.
“Cariakan pian biji salak nang lamah, amun kadada nang mirip ja ulun hakun haja,” ujar nang bini pina balamah.
Lawas palui bapikir, napa nang dihandaki bininya. Kada lawas inya lihum tatawa sambil mamaraki nang bini. “Sabar umanya ai, kaena malam haja kucariakan,” ujar Palui paham kahandak nang bini.
