Satiap malam Jumahat di kampung Palui maadakan yasinan. Bila kada di langgar, ada jua nang basaru ka rumah-rumah. Kabatulan malam Jumahat ini kana giliran di rumah pambakal Zain.
Tulak kah Lui malam ini? ujar Garbus manakuni Palui.
Insya Allah Bus ai. Amun disaru ka rumah, pamali kada datang, ujar Palui basamangat.
Pamali napanya? ikam itu pasti mamikirakan makanannya haja, ujar Tulamak manumapalak.
Malamnya takumpulan bubuhan Palui, Garbus, Tulamak manuju ka rumah pambakal. Sidin maundang guru tumatan subarang kampung gasan bacaramah.
Malam ini kita basyukur badapat lagi barataan, lawan jua basyukur lawan kadatangan pambakal kita dari Makkah. Mudahan sidin jadi haji mabrur, ujar guru mamulai caramah.
Amin, ujar saruan mandarau.
Amun kita mampu jangan lagi manundanunda naik haji, itu kawajiban kita baratan, ujar guru lagi.
Amun makan tahutang pang guru? ujar Garbus.
Itu kada wajib Bus ai, malah bisa tasalah manalantarkan anak bini tahutang- hutang kahandakan babulang, ujar guru lagi.
Amun manaiki haji bulih haja kalu guru lah? ujar Palui sambil tatawa.
Bulih haja, asal nikah dahulu, ujar guru manyahuti. Handak lah buhan ikam baamalan supaya bisa jua naik haji, ujar guru manakuni.
Handak banar kami, ujar Palui manjawab.
Amalakan surat Al- Fatihah, Saban hari 7 kali, tarus Surat An Nass, ujar guru
Tarus napa lagi guru amalan nang lainnya? ujar Garbus.
Amalan nang lainnya kena ku fotokopiakan haja nah, banyak bacaannya, ujar guru lagi.
Kalu nang capat adalah guru, kalu ada napa suratnya? ujar Palui manahapi.
Amalan nang lakas kawa naik haji sutil haja Lui ai. banyaki amalan surat tanah, aku yakin bubuhan ikam tulakan barataan, ujar guru tatawa.
Uma ai guru, ulun maka handak mancatat tadi, sakalinya surat tanah, ujar Palui kakalahan. Sajampaljampal ulun kadada baisi surat tanah, kacuali ampun mintuha, ujar Palui lagi.
Ha… ha… Kana am hari ini Palui dikalahi paguruan, ngalih am mambalas, ujar Tulamak wan Garbus tatawan.
