KALAKUAN Palui bujur-bujur kaya paribahasa urang bahari tuha-tuha kaladi makin tuha makin manjadi-jadi. Ibarat nyiur makin tuha makin baminyak. Kada kawa talihat bibinian pina langkar sadikit langsung ditakuni ngaran dibawai bakanalan, imbah itu batakun numur talipun atawa alamat rumah. Hanyar kalu ada kasampatan dibawainya bagandakan. Padahal bininya sudah talu ikung, tapi tatap haja inya pina mangidas.
“Bujur haja kalakuan Palui makin manjadi-jadi tapi kada kalihatan mancolok liur baiknya,” ujar Tulamak.
“Kalu kalakuan sudah manjadi-jadi ngalih disambunyiakan Mak ai. Dimana haja pasti kalihatan kijil wan kidasnya,” ujar Garbus.
“Nah, aku sapandapat wan Tulamak bahwa samunyaan nang kita gawi itu harus pakai parhitungan. Apalagi kita nang sudah babini dan baranakan ini. Tapi walaupun sudah mamakai parhitungan bahanu ada jua tahilapnya,” ujar Palui.
“Napa cuntuhnya Lui?” ujar Garbus.
“Cuntuhnya hanyar haja kualami. Aku bapapatuhan wan si Inur langkar nang balu itu. Inya baisian dua ikung anak. Karna inya pina mambari kasampatan banar maka tapaksa kulawani karna cucuk jua lawan liurku,” ujar Palui.
“Ooo… jadi handak ikam kawinilah Lui?” ujar Tuamak.
“Paling sadikit kawa dijadikan panyinggahan. Hanya inya baucap bahwa anaknya itu mancari abah karna inya basarakan wayah anaknya lagi halus. Lalu si Inur itu maminta supaya aku jadi abahnya. Artinya amun bajadian maka akulah nang maharagunya,” ujar Palui bakisah.
“Artinya ikam cagar baisian anak tirilah Lui?” ujar Garbus.
“Tapaksa Bus ai. Karna handak mamiliki umanya maka tapaksa manarima anaknya.
Eee… sakalinya, imbah kuakuri anaknya itu jadi anak tiriku, tanyata inya kawin ka lain. Kawin wan gandaknya tadahulu,” ujar Palui manyasal.
“Kalu kaya itu kukira si Inur kada tasalah. Bujur haja si anak itu mancari abahnya wan kabatulan ikam manyanggupi. Karna ikam jadi abahnya wajar haja jua inya kawin ka lain,” ujar Tulamak.
“Nah, itulah buktinya bahwa kalakuan ikam kijil wan lanji, tanyata parhitungan ikam maleset tapaksa manarima gatahnya,” ujar Garbus mahuhulut Palui.
“Nasib… nasib, sudah nasibku Bus ai,” ujar Palui handak manangis. (rep/ivd/tam)
