TIAP hari pakan saminggu sakali Palui tulak ka pasar, tujuannya kada lain hanya handak balilihat haja, atawa manukar barang saraba sadikit kaya timbaku, tali wan kawat unjun, atawa manukarakan kiriman bininya gasan dapur
“Kalu sudah tuntung batutukar lakasi bulik abahnya ai, jangan sampai tatahantahan di jalan kaina kahujanan garing pulang awak,” ujar bininya.
“Aku paham haja umanya ai. Kada usah curigalah kadada jua urang nang handak wan aku nang kada paduitan ini,” sahut Palui.
“Nang dikahandaki urang kada duitnya tapi wayah ini banyak bibinian nang hakun dimadu dijadiakan bini anum,” ujar bini Palui.
“Alhamdulillah, artinya aku ini masih payu haja wan bibinian nang bujang-bujang,” ujar Palui manyirit ka bininya.
Imbah tuntung bapander, Palui langsung manurunakan sapida buruknya lalu maninjak laju ampah ka pasar. Balum sampai simpang tiga, Palui malihat banyak urang bamandakan di pinggir jalan.
“Satop….. ayu satop,” ujar patugas. Palui takajut, manggatar lalu mangacak rem sapidanya.
“Ayu turun matan sapida, adakah sampiyan mambawa lading atawa karis,” ujar patugas batakun.
“Kanapa ada musuhkah maka pina bacarian lading wan karis. Wayah ini jaman aman kada kaya wayah revolusi tadi kita kamana-mana basanguan tarus,” sahut Palui.
“Itu napa bajujulan di higa pinggang, pasti ada mambawa sanjata,” ujar patugas sambil manunjuk ka pinggang Palui.
“Ini…….ini tukul,” jawab Palui.
“Tukul tamasuk sanjata jua. Ayu kaluarakan!” ujar patugas.
“Maaf hajalah, tukul ini kada kawa dikaluarakan,” jawab Palui
“Aku parlu malihat karna tukul amun dicatukakan bisa mamati-i urang,” ujar patugas sarik.
“Tukul ini bawaanku matan halus,” ujar Palui pulang.
“Ayu lakasi buka bajunya, kalu kada sampiyan kutahan kada bulih ka pasar!” ujarnya.
“Umailah, karas banar kawal kita ini kada pamarcayaan wan nang tuha kaya aku ini,” ujar Palui manyindir.
“Ini parintah atasan karna kaadaan mancekam,” sahut petugas.
“Karna dipaksa maka Palui manuruti haja, disandarakannya sapida kapunggung nyiur lalu bagamat dibukanya baju sambil malihatakan tukulnya di pinggang nang ganalnya kaya ganggam.
“Nah……ini tukulnya, sudah kupadahakan matan tadi bahwa tukul ini bawaan matan dalam parut, ujar Palui.
“Ooooo……. kukira tadi tukul wasi kaya gasan batukang, sakalinya tukul awak daging tumbuh,” ujar patugas.
“Maaflah, ulun salah kira, ayu silakan sampiyan batarus ampah ka pasar,” ujar patugas imbah mancium tangan Palui. (emhati/rep)
