Kisah Palui Mahimungi Pakayian
Matan halus Palui sudah umpat wan kayinya. Mulai sakulah SD sampai tamat kayinyalah nang mambiayai, kayinya jua nang mambari makan wan mambari duit gasan baulanja. Ulih karna itu Palui sayang banar wan kayinya itu.
Umur sampiyan sudah barapa kayi? ujar Palui batakun.
Kalu hitungannya aku kada tahu pas, tapi ujar aruwah datu dahulu aku dilahirakan wayah baah ganal di banua kita ini kurang labih tujuh puluh lima tahun nang lalu, ujar kayi.
Kalu kaya itu sampiyan bahujung banyak banar, ujar Palui.
Bahujung napa Lui? Jangankan bahujung malah marugi. Wayah ini awak sudah ringkut, pinggang sakit, tulang rasa dicucuk-cucuk, bajalan manggatar wan tabungkuk-bungkuk, ujar nang kayi.
Kayaapapun pian sudah bahujung di umur, dibanding banyak urang nang mati anum. Umur Nabi kita haja 63 tahun, sadangkan umur pian 75 tahun. Artinya sampiyan sudah bahujung 12 tahun dibanding umur Nabi, ujar Palui.
Alhamdulillah Lui ai, makanya turutilah kabiasaan kayi. Baisi bini saikung haja, wayah lagi anum jangan boros, jangan bapoya-poya ka bibinian karna bisa mangaringi tulang sumsum, ujar kayi manasihati.
Tarima kasih nasihat kayi, mudahan ulun kawa mawarisinya, ujar Palui.
Cuba Lui kawalah ikam manukarakan kursi nang kawa bajalan kaya di tivi itu, ujar kayi maminta Palui.
Kalu sampiyan handak jua kaina ulun usahakan, ujar Palui manyanggupi. Palui langsung ka rumah Tulamak, minta tulung mamarina Tulamak nang tukang kayu supaya maulahakan kursi baroda.
Aku kada bisa maulah kursi roda kaya di tivi itu Lui ai, ujar mamarina Tulamak.
Diakali haja julak ai, kursi kayu nang sampiyan ulah itu dipasangi rodanya. Rodanya adalah roda sapida kakanakan, lalu dipasang remnya, ujar Palui manuduhi.
Pintar ikam Lui ai maakali, ujar mamarina Tulamak.
Nang panting adalah fungsinya, kada bantuk wan haraganya. Kursi itu kawa diduduki wan bisa bajalan bila ditunjul, ujar Palui mangalakak tatawa wayah manjulung kursi itu ka kayinya.
Tarima kasihlah cucuku, ikam pintar banar manyanangi hati kayi. Kaina huhujungan umurku nang 12 tahun itu kubariakan wan ikam, ujar kayi mamuji Palui.
