Kisah Palui – Kontrak Hidup
Ngalih wayah ne jadi PNS. Pamarintah maangkat pagawai kontrak haja. Bila akhir tahun dievaluasi, kaya apa kinerjanya. Bila bagus tatap lanjut, bila buruk dipagat kontraknya. Lalu cari lagi pagawai kontrak nang lain.
Kaya nitu jua Allah Ta’ala wan manusia maulah parjanjian waktu di alam arwah. Bila kada hakun akan parjanjian maka dipastikan maninggal dunia.
”Kita ne sudah MoU wan Allah Ta’ala,” ujar Palui ka Garbus.
“Kada mangarti aku Lui ai, apa pulang jar ikam ya?” Garbus bingung.
“MoU nitu bahasa laut, Memoradum of Understanding, artinya panandatanganan parjanjian antara kita wan Allah Ta’ala , sabalum kita lahir ka dunia naya,” ujar Palui manjalasakan.
“Oh damintukah Lui,” sahut Tulamak nang matan tadi tanganga mandangar panderan Palui.
“Iya sakali-sakalilah aku bapander bahasa laut. Ujar urang di sakulahan bahasa Inggris,” Palui lihum.
“Ayuha Lui ai, ikam pang saraba tahu,” sambat Garbus.
Nang ngaran kontrak hidup manusia di dunia ne kadada nang tahunya, barapa tahun parjanjiannya. Dirasa-rasa saurang haja. Ada nang umur bayi habis sudah kontrak hidupnya alias mati, ada nang umur 10 tahun habis.
”Ikam Lui barapa tahun kontrak hidupnya?” takun Tulamak.
“Aku umur 46 tahun. Jadi sudah manjalani tiga per empat kontrak mun mangacu umur Nabi Muhammad SAW 63 tahun,” ujar Palui mantap.
“Bararti ibarat parjalanan hari, waktu salat Asar sudah, artinya dua jam lagi Maghrib iyakah, habis am kontrak hidup ikam Lui ai,” sahut Garbus.
“Bagitulah kira-kira. Nang panting jalani nang ada ne. Ppabilakah dipagat Tuhan kontrak harus siap, siapa tahu ditambah sampai ka waktu Isya,” jawab Palui sambil lihum.
Palui lalu bakisah sua malihat urang rahatan manyupir di tangah kartak, diputus kontrak wan Allah Ta’ala.
“Aku takutannya pas malakukan maksiat, kontrak hidup dicabut Tuhan, makalahan am, kada sampat betaubat, bisa mati kada baiman nitu,” sambat Garbus.
“Makanya gawian nitu nang baik-baik haja, usaha nang halal dicari. Apalagi kita mangaku urang baiman. Iyakah Lui?” sambung Tulamak.
“Iya banar Mak ai. Bahati-hati hidup ne. Jangan kada tahu burit kapala, nang halal dimakan, nang haram jua dimakan. Pacangan sakit ya matinya?’ Palui bisa bapander mampangaruhi kakawalannya.
“Ampih sudah bapander, urang azan salat zuhur di Masjid Al Abrar,” ujar Tulamak.
Badadas buhannya batalu sapakawalan nitu manuju masjid. Han jarku buhannya ne kawa dicuntuh pambaca satia ai?
