Sabulanan Palui kada saling cangulan. Jangankan bakakawanan, ka gardu wadah bubuhannya rancak bakumpul, di masigit haja kada parnah kalihatan.
“Bus, adalah ikam batamuan wan kawal kita si Palui, sudah sabulanan ini inya kada cungul-cungul?” ujar Tulamak manakuni Garbus.
“Hi-ih, Biasanya tadapat haja, amun kada di gardu atawa di masigit, bisa jua di warung acil Irus. Kalu pina inya garing bangat. Baiknya kita bailang karumahnya haja,” ujar Garbus.
“Baiknya kita batakun haja, itu nah kabalujuran bininya bajalan ampah ka sini,” ujar Tulamak manunjuk bini Palui nang handak tulak ka pasar.
“Uii.. bini Palui, kamana abahnya lawas kada kalihatan?” ujar bubuhannya tapaimbai. “Itu ada ai, ada haja di rumah lagi mambari makani hayam,” ujar bini Palui.
“Kanapa maka lawas kada kalihatan? Kami kira garing, makanya handak kami ilangi,” ujar Garbus pulang.
“Oooo.. Lakiku itu sabulanan madam ka Jakarta, hanyar haja bulik ka rumah malam tadi. Ini nah aku dibawakannya kangkalung ulih-ulih matan Jakarta,” ujar bini Palui manampaiakan kangkalung.
“Amun bubuhan ikam handak batamuan, bailang haja ka rumah,” ujar bininya Palui pulang.
Imbah bapanderan, bubuhannya langsung tulakan ka rumah Palui. “Lui.. ui Lui, bagandah nyiru kami mancari-i, kanapa maka tulak madam kada bapapadahan wan kakawalan?” ujar Tulamak.
“Ampun maap kakawalan lah, aku bagagasakan tulak jadi kada sawat bapamitan wan bubuhan ikam,” ujar Palui manyahuti.
“Nangkaya apa Lui kuta Jakarta wayah ini?” ujar Garbus manakuni.
“Makin babanyak gadung-gadung tingginya bus ai, makin babagus haja,” ujar Palui. “Sudahlah Lui ikam bakunjang ka Istora Sanayan, Monas atawa ka Ancol?” ujar Tulamak handak mandangar kesah Palui.
“Sabarataan sudah aku datangi Mak ai. Bahkan satiap baisukan aku baulahraga lari di stadiun istora itu, kamariannya aku hanyar ka Monas main sapatu roda,” ujar Palui baagak.
“Kalu nang ngarannya Jambatan Semanggi itu nangkaya apa ganalnya Lui?,” ujar Tulamak pulang.
“Jambatan Semanggi?” ujar Palui bapikir satumat.
“Ganaaaaaallll banar Mak ai.
Jambatan Barito kita haja kada saujung kukunya. Sungainya jua ganal banar, talu kali sungai Martapura.
Satiap hari parai, amun kada ka Ancol, aku pasti maunjun di jambatan Semanggi itu,” ujar Palui makin baagak.
“Ha..ha..ha, Palui pangaramput, Palui pangaramput,” ujar Garbus bakakajutan. Jambatan Semanggi itu kadada sungainya, kada nangkaya di banua sini satiap jambatan pasti ada sungainya. Baarti Palui bakaramput, inya kada tulak ka Jakarta tapi…,” ujar Garbus manawaakan.
“Ssssssttttt… jangan tumbur Bus, kaina kadangaran ulih biniku. Aku samalam bapadah tulak ka Jakarta,” ujar Palui manukupi muntung Garbus. “Amun kada ka Jakarta, lalu kamana sabulanan ini ikam manghilang Lui?” ujar Tulamak mulai curiga.
“Hi-ih, aku bakaramput wan bubuhan ikam. Aku kada tulak madam, tapi aku ba-poligami alias babini anum pulang,” ujar Palui kasasipuan.
