Bubuhan Palui wan kakawalannya si Garbus, Tulamak lawan Tuhirang tamasuk bubuhan SAR alias bubuhan SARuan. Artinya bubuhannya itu kada kawa mandangar urang baaruhan atawa basalamatan, pasti hadir. Imbah itu amun kawa buliknya mambarakat pulang gasan nang di rumah.
“Bila bulan anum tiap hari ahad pasti ada urang nang bakakawinan lalu kaya apa rancana kita?” ujar Tulamak batakun.
“Kalu kaya itu kita babagi tugas, nang manyalidiki urang baaruhan siang adalah Tulamak wan Tuhirang, nang manyaladiki urang baaruhan malam adalah aku wan Palui,” ujar Garbus.
Imbah tuntung sambahyang isya, Palui mandangar habar bahwa di rumah haji Durazak cagar basalamatan batasmiah cucunya, maka langsung inya bahabar wan kakawalan.” Bus, ayu kita saruan ka wadah Haji Durazak,” ujar Palui mambawai kakawalannya.
“Kami tarima kasih banar Lui ai bubuhan ikam datang karna salamatan ini mandadak, jadi kada banyak basaruan. Makanya kami minta ikam nang mambacaakan doa salamatnya,” ujar Haji Durazak.
“Baiknya ikam jua Lui,” ujar Garbus manyuruh.
Palui mulai manggitir disuruh wak Durazak karna inya sabujurnya kada biasa mambaca doa, tapi inya indah kalah lalu mawaniakan diri batakun: “Doa nang mana ji?,” ujar Palui.
“Tasarah ikam haja,” sahut Haji Durazak.
“Doa nang lawas ulun sudah kada ingat lagi,” sahut Palui.
“Kalu doa nang lawas sudah kalumpanan, maka aku hakun haja doa nang hanyar,” ujar Haji Razak.
“Doa nang hanyar…….. doa nang hanyar ulun balum balajar, sahut Palui bagamat pina supan.
“Kalu ikam kada ingat doa lawas wan kada bisa doa hanyar, aku haja mambacaakan doa sapu jagat, ujar Haji Durazak, amin…. amin….. rabbana atina………… amin, amin, alhamdulillahirabbil alamin.
“Ayu makani papancukannya, jangan supan-supan kami masih banyak haja cadangan asam palipisan, limau wan pisang manggalanya, ujar Haji Durazak.
