Kisah Palui Kakanyangan
Salawas bulan puasa ini Palui sapakawalan rajin banar Sambahyang subuh di masigit. Biasanya imbah tuntung basahur bubuhannya takumpul di gardu runda lalu baimbai tulakan sambahyang.
Kamana Tulamak sudah talu hari ini kada umpat basubuh di masigit Lui? ujar Garbus manakuni Palui.
Sabaiknya kaina imbah dari masigit kita bailang haja, siapa tahu inya garing bangat lalu kada sawat bahari raya, ujar Palui manggayai.
Kada bulih mamander nang kada manyamani Lui ai. Sabaiknya umpat mandoaakan supaya inya lakas sigar, ujar Garbus mambila.
Imbah tuntung basubuh di masigit sabalum bulikan ka rumah, bubuhannya singgahan ka rumah Tulamak.
Ui… bini Tulamak, mana abahnya sudah talu hari ini kada saling cangulan di masigit? ujar Palui manakuni bini Tulamak.
Lakiku ada haja, ujar bini Tulamak manyahuti.
Kalu ada haja di rumah kanapa maka kada basubuh nangkaya biasanya, garingkah inya? ujar Garbus umpat batakun.
Kada tahu jua, tadi wayah sahur sidin kada napa-napa, tapi imbah sahur sidin nangkaya kada bagarak sampai kada kawa basubuh lagi, ujar bini Tulamak.
Itu ngarannya panyakit K bini Tulamak ai wan ngalih bacari ubatnya, ujar Garbus bagaya.
Napa itu panyakit K asa hanyar mandangar aku? Cubai tulung tatamba-akan atau cariakan ubatnya, ujar bini Tulamak manggasak.
Panyakit K itu adalah panyakit malas alias koler, ubatnya kadada urang bajual, ujar Garbus pulang.
Cuba aku umpat malihat satumat nangkaya apa inya, ujar Palui lalu parmisi masuk ka dalam, Kada lawas inya kaluar pulang.
Nangkaya apa Lui, kawa lah lakiku babangun? ujar bini Tulamak manakuni.
Bujuran garingkah inya Lui? ujar Garbus umpat jua batakun.
Hi-ih, inya dasar bujuran garing Bus ai. Tapi lain panyakit K nangkaya ikam padahakan tadi, tapi panyakit TL. Kaina imbah parak siang pasti waras haja, ujar Palui.
Napa pulang panyakit TL itu Lui, napa ubatnya? ujar bini Tulamak makin kada paham.
Panyakit TL itu adalah panyakit nang diulah. Ubatnya nyaman haja. Isuk kaina wayah basahur tulung jangan bamasak nasi banyak-banyak, saparlunya haja. Karna bila ikam bamasak balabihan laki ikam itu cagar kada kawa bagarak lagi karna kakanyangan, ujar Palui manjalasakan.
Napa garang panyakit TL itu Lui? ujar Garbus wan bini Tulamak taimbai batakun.
Panyakit TL itu adalah panyakit Takutan Lapar. Karna takutan lapar itulah laki ikam bahimat batambah sampai malima anam piring wayah basahur, akibatnya inya kada kawa bagarak lagi nangkaya hadangan nang hanyar disambalih, ujar Palui mamacahakan rahasianya.
