Kisah Palui Kada Kasiangan
Wayah musim kamarau, urang rami maunjun. Kaya itu jua Palui wan kakawalannya bilang hari-hari kadada lain nang digawi pada mambanjuri iwak.
Ayu pang kita buktiakan kaena, siapa nang paling harat maunjun, ujar Palui manantang kakawalannya.
Ayu ja, Tulamak manyahut.
Kita buktiakan siapa nang paling banyak bakulih iwak.
Oke, tampulu unjunku sudah ku rajah supaya iwak kamimiyangan manyasah, ujar Garbus.
Nang panting kita wadahnya bapisah lah? Kada bulih baparakan, lawan kada bulih culas, iwak manukar bapadah kulihan maunjun, ujar Palui.
Akur aku, kita tulak jam lima limbah sambahyang subuh, ujar Tuhirang maakuri.
Isuknya limbah subuh, Palui, Tuhirang, Tulamak, wan Garbus tulakan ka wadah paunjunan. Limbah tangah hari buhannya sudah takumpul di rumah Palui mambawa hasil paunjunan.
Kaya apa ikam Mak, barapa kulihan? ujar Garbus.
Aku dapat haruan tiga, papuyu lima, ujar Tulamak manampaiakan kulihannya.
Manang ikam Mak ai. aku dapat lima ikung haja, halus-halus pulang, ujar Garbus.
Baarti aku nang paling banyak pada nang lain. Barataan 10 ikung, maka ganal-ganal iwaknya, ujar Tuhirang.
Ampun ikam pang lui, tumatan tadi aku kadada malihat bakul ikam? ujar tuhirang manakuni.
Buhan ikam tanang haja, nang pasti aku kada kasiangan, ujar Palui.
Kada mau kaya itu Lui ai, mana buktinya amun ikam kada kasiangan? ujar Tulamak panasaran.
Takanuni saurang lawan biniku. Karna ampunku sudah ku unjuk lawan inya, ujar Palui.
Uuiii.. bini Palui. Bujurkah abahnya tadi kada kasiangan? mana iwaknya? ujar Garbus manakuni bini Palui.
Iwaknya sudah ku masaki, bujur ai inya tadi kada kasiangan, ujar bini Palui mamadahi.
Barapa ikung garang inya dapat maka kada kasiangan? ujar Tuhirang.
Talu ikung haja, anak kulacingan ja lagi, ujar bini Palui bapadah.
Kanapa maka bapadah kada kasiangan, amun cuma talu ikung? Ikam umpat mangaramputakan laki ikam kah, ujar Garbus manumpalak bini Palui.
Kanapa aku dituduh mangaramputakan lakiku? Abahnya tadi dasar kada kasiangan.
Inya tulak jam 5 subuh, bulik jam 10, artinya inya bulik kada kasiangan kalu? ujar bini Palui.
Nah, kada bakaramput kalu aku, ujar Palui lihum. Aku tadi bulik badahulu karna kupikir iwak kulihan samalam masih banyak haja. Hari ini aku kuler maunjun, baik malukupi biniku dirumah, ujar Palui tatawa.
Kana kita dikaramputinya laki bini. Kami kira kada kasiangan iwaknya, sakalinya kada kasiangan hari, ujar Garbus langsung mambawai Tuhirang wan Tulamak bulikan.