Kisah Palui Kada Disaru
Julak Ambutut mamarinanya Tulamak tahun ini naik haji sakaluargaan, karna dapat duit panggantian panggusuran tanah halaman yang dijadiakan jalanan.
Lalu bamufakat handak basalamatan manyaru warga kampung sabarataan. Karna banyaknya nang disaru, maka bubuhannya tapaksa babagi tugas.
“Ikam Mak ai manyaru samunyaan kaluarga di hilir,” ujar mamarinanya.
“Inggih ulun siap julak ai, samunyaan kaluarga sampiyan ulun saru,” ujar Tulamak.
“Ikam Bus ai manyaru bubuhan kapatuhan nang di hulu,” ujar julak Ambutut.
“Beres Julak ai, samunyaan pasti datang karna sudah tahu sampiyan sakaluargaan handak naik kaji karna
sudah malihat sampiyan babarapa kali umpat manasik,” ujar Garbus.
“Ulun dapat tugas jualah Lak?” ujar Palui batawar diri handak mambantu.
“Naahh… ikam ini Lui ai tamasuk nang banyak dipatuhi dan disanangi urang, jadi banyak kapatuhan ikam, makanya ikam kutunjuk manyaru bubuhan urang subarang sana. Jadi sarui sabarataan,” ujar mamarina Tulamak manyuruh Palui.
Imbah babagi tugas, samunyaan sudah taundang maka wayah basalamatan itu takumpulanlah sabarataaan.
Imbah tuntung acara, mambaca doa lalu makanan. Wayah makanan itulah bubuhannya galu mancari’i si Palui kaluar ka dalam rumah karna sama sakali kada kalihatan batang hidungnya.
“Mana Palui, mana Palui?” ujar mamarina Tulamak.
“Mungkin inya garing Julak ai, karna kamarian tadi kalihatan inya pina bahingusan, salismaan,” sahut Tulamak.
“Kasihan banar inya uyuh basaruan sampai dua talu kali bulik ka subarang sana. Ayu lakasi cari’i, datangi, rumahnya parak haja. Ayu aku umpat jua mailangi, kasihan kalu inya bujur-bujur garing,” ujar mamarinanya manyuruh Tulamak wan Garbus.
Lalu Tulamak wan Garbus diiringi Julaknya tulakan mandatangi rumah Palui. Imbah sampai lalu bubuhannya bakiyauan.
“Luiiii… ui Palui,” ujar Julak Ambutut.
Palui manyalakan lampu dan mambuka lawang lalu sambil takajut lalu baucap; “Kanapa bubuhan sampiyan pina barumbungan mandatangi ulun, ulun sihat haja kada kamana-mana,” ujar Palui sambil manyuruh bubuhannya masukan ka rumah.
“Kanapa maka ikam tadi kada datang kami basalamatan, kami baaruhan sakaluargaaan. Maka samalam ikam kusuruh manyaru bubuhan subarang, dan samunyaan nang ikam saru itu datangan,” ujar Julak.
“Anu… anu Julak ai, samalam itu sampiyan manyuruh ulun manyaru bubuhan urang subarang, tugas itu sudah ulun laksanakan, alhamdulillah kalu sudah datangan,” ujar Palui.
“Tapi kanapa maka ikam kada datang,” ujar Julak Ambutut.
“Ulun kada datang karna sampiyan kadada manyaru ulun, sampiyan hanya manyuruh saruakan urang subarang, makanya ulun laksanakan,” ujar Palui bujur harus bapadah apa adanya.
“Maaf Lui, maaf Lui, maksudku saruakan urang subarang itu tamasuk manyaru ikam,” ujar Julak Ambutut minta maaf sambil mancium tangan Palui.
