Kisah Palui dan Hayam Tulamak
Palui nang biasanya razin ka langgar, subuh itu kada kalihatan batang hidungnya. Kakawalannya nang biasa tapaimbai tulak ka langgar haja bingung, kada biasanya Palui kada turun.
“Aku subuh tadi kada tabangun Mak ae. Pas tabangun sudah jam,tapaksa sambahyang di rumah haja,” ujarPalui.
“Makanya manukar jam beker Lui ai atau turuti aku nang baharaguan hayam laki,” ujar Tulamak.
“Napa hubungannya hayam laki lawan bangun sahur Mak?” ujar Garbus kada paham.
“Hayamku lah nang rancak mambangunakan aku Bus ai, saban subuh pasti bakongkook,” ujar Tulamak bakisah.
“Tapi salawas kita batatangga, balum parnah aku mandangar hayam ikam bakongkook subuh-subuh,” ujar Palui.
“Artinya dasar ikam nang guring mati Lui ai, padahal rumah kita batatai, kandang hayamku parak lawan kamar ikam.”
“Aku wani basumpah Mak ai, aku dasar kada suah mandangar ayam laki ikam bakongko-ok subuh, ujarPalui mangaramputiakan.
“Ikam jangan badusta Lui ai, hayamku ini hayam bangkok, saban subuh inya bakangkook saling nyaringan,” ujar Tulamak karas.
“Nangkaya ini haja nah… Pokoknya bila subuh kaina hayam laki Tulamak bakongkook subuh, aku wani mambayari makan minum di warung acil irus,” ujarPalui kada hakun kalah
“Akur… Dangari subuh ini pasti ayamku bakongkook,” ujar Tulamak.
“Kada usah mahadang subuh, ingatakan wayahini ja. Jawab Bus bujur-bujur, suahlah ikam mandangar ada hayam bakongkook subuh-subuh… bangunan, bangunan..,” ujar Palui lihum.
Lawas bubuhannya badua bapikir, hanyar Garbus wan Tulamak pina ranai limbah tahu dihalabionya Palui.
“Ampun Palui kada salah mak ai, aku dasar balum suah mandangar ada hayam nang bakongkook subuh-subuh.
Nang ada bunyinya ya kaya ayam jua, kong-ko-okkkkkkkkk!” ujar Garbus maniruakan suara hayam sambil tatawa.
“Ngalih malawani Palui ni, tatap haja ampun inya nang manang,” ujar Tulamak gagarunum kakalahaan.
