Kisah Palui dan Hanuman Sakti
BUHAN Palui sapakawanan tamasuk urang taubsisi (terobsesi) untuk malastariakan budaya dairah kita Banjar. Buhannya baisian grup sandiwara kaliling kampung nang bangaran ‘Grup Patikaman’! Tujuannya kada lain gasan mahibur masyarakat sakaligus malastariakan kasanian dairah wan jua mampartahankan ‘basa Banjar’. Sabab ujar Kapala Shuynya (Bapak Palui), “Kalu kada kita nang paduli awan seni-budaya dairah kita, siapa lagi nang diharap (?).
Ulih karna itu Seni-budaya nitu harus kita palihara barsama-sama awan saluruh masyarakat. Kita jaga sagan kita warisakan kaalah anak-cucu kita. Amun kada kaya itu kalawasannya bisa hilang. Kada usah jauh-jauh, cuntuhnya nangkaya ‘basa Banjar’ haja wayah hini kakanakan banyak nang kada mangarti lagi, tarlabih istilah-istilah urang bahari!”
“Aku sapandapat banar awan ikam, Lui-ai !”, ujar Garbus manyahuti Palui. “Cucuku haja amun kubasai basa Banjar, inya pina nganga-nganga banyak nang kada mangarti”.
“Iya-ai .., (sahut Tulamak), Apalagi amun kita bapandir mamakai kusa-kata urang bahari nang wayah hini sudah jarang tadangar nangkaya, takulipay.., maintil.., tasindaga, dan lain-lain.”
Garbus manyambung, “Maka pulang basa Banjar ni mangisahakan ‘urang tagugur’ haja bahasanya bisa macam-macam, nangkaya, tajuramba, tajungkang, tatiharap, tadangsar, tasumbalit, tajarungkup, taambung, tasarudup ; nang samunyaan nitu baarti ‘tagugur’. Cuma cara gugurnya haja nang babida !”
“Ngumung punya ngumung, tampulu ingat, jadilah malam ahad kaina grup sandiwara kita main di kampung subalah ?” Tuhalus maalih pamandiran.
“Jadi..! Tuhalus-ai.., Kadada parubahan. Sasuai rancana kita akan maangkat kisah wayang ‘Hanuman Sakti Mandraguna’. Nang jadi Hanumannya tatap haja kawan kita Garbus,” ujar Palui sarius.
“Tapi jangan kada ingat, hunur bagianku tulung diganali sadikit. Sualnya paran sabagai Hanuman Si Warik Putih nitu talapah pada nang lain, apang bajalannya aur luncat-luncat haja,” ujar Garbus badiplumasi.
“Ayuha, Bus-ai. Sual nitu Boss Palui paham haja kaya nang sudah-sudah,” sahut Tulamak sambil manyirit kaalah Palui.
Sasuai rancana, malam ahad nitu bubuhan grup ‘Patikaman’ jadi jua main di kampung subalah. Sabalum mulai partuinjukan, Palui sabagai kapala ahuy manyampaiakan sakapur sirih, saantum dua antum kata pambukaan. “Bapa-bapa, ibu-ibu, sudara-sudara panuntun sakalian ! Kami dari grup sandiwara ‘Patikaman’ maucapakan baribu tarima kasih atas sambutan pian barataan manuntun sandiwara kami malam ini. Sabagaimana pian maklumi, judul lakun nang akan kami bawakan malam ini adalah ‘Hanuman Sakti Mandraguna’. Dan sabagai pamain utamanya, yaitu sabagai Hanuman, Si Warik Putih nang sakti, kami parcayakan kapada pamain kawakan kami, yaitu sudara Garbus. Silakan kita bari ‘tapuk tangan yang bergemuroh’ kapada bung Garbus dan Patikaman !!” (Palui karap jua manuntun filim kartun ‘Upin-Ipin, jadi bahanu inya umpat jua babasa Malaysia !). “Uu iya para panuntun sakalian, mari kita jaga katanangan dan kaamanan barsama. Salamat manyaksiakan !!” Palui maakhiri sambutannya, panuntun pun baampikan.
Bagitu layar disingkap dinaikakan, sambil baluncat-luncat Garbus kaluar, langkap dangan kustum ‘warik putih babuntut panjang. “Hahahaa.. Inilah saya ‘Hanuman Sakti Mandraguna’, nang sudah parnah batapa ampat puluh hari ampat puluh malam di gunung halau-halau!!” Panuntun kuriakan antusias sambil baampikan, ada jua nang basuit-suit.
Satalah manganalakan diri nitu, Garbus baluncat ka muka, baluncat ka balakang, baluncat ka kiwa, baluncat ka kanan. Tatapi tiba-tiba, Si Hanuman Sakti Mandraguna nitu bakuriak; ‘Aduhhh..!!’ (balalu imbah hitu inya taduduk kasakitan) batisnya badarahan tajajak paku picik nang tacicir bakas buhannya mamasang dikurasi. Satalah taduduk sambil sagra mancabut paku picik jaharu nitu, Garbus kamudian badiri pina pincat, muhanya takuringis manahan sakit. Garbus lalu baucap mahadap panuntun, “Para panuntun sakalian, ulun ‘Hanuman’ minta maaf, untuk samantara handak batapa kambali, supaya taguh amun tajajak paku picik !!” Imbah hitu Garbus pun bajalan kucingkal-kucingkal manuju lawang tinda masuk ka balakang panggung mancari ‘ubat habang’.
