PALUI siang itu handak ka pahumaan manuntungakan gawian. Di rumah kadada siapa-siapa lagi kacuali anaknya nang panuhanya. Bininya tulak ka arisan mambawa anaknya nang pahalusnya. Tapaksa inya bapasan wan anaknya supaya manjagai rumah wan jamuran.
“Aku bapasan wan ikam nak ai, kaina bila ada urang mancari aku handak baurusan atawa ada kaparluan lain maka lakas-lakas kiau aku di pahumaan,” ujar Palui bapasan.
Imbah bapasan Palui langsung maambil tupi wan tajak lalu langsung tulak ka pahumaan nang jauhnya kurang labih satangah pal matan rumahnya. Paharatan anak Palui manunggui jamuran kada lawas datang manggalugur sapida mutur bamandak di halaman rumah Palui. Urang itu langsung batakun, “Bujurkah ini rumah Palui?”
“Inggih ini rumah abah ulun,” sahut anak Palui. “Kalu sampiyan handak batamu sidin hadangi satumat ulun kiyauakan karna tadi sidin bapasan bila ada nang mancarii supaya sidin diambili,” ujar anak Palui.
“Ada nang handak kutakunakan,” ujar tamu itu.
“Sambil mahadangi abah ulun, silakan sampiyan masuk ka rumah,” ujar anak Palui sambil manyadiakan nginuman wan wadainya.
Anak Palui langsung bukah ka pahumaan mandapati abahnya lalu sambil hingak-hingak kauyuhan baucap; “Bah…..abah, di rumah ada tamu mancari-i piyan, pinanya panting banar,” ujar anak Palui.
“Kaya apa urangnya?”
“Urangnya gagah, basapida mutur wan badasi,” ujar Tukil.
“Pasti panting banar, mungkin urang bank handak mainjami kridit usaha ,” ujar Palui. Lalu inya langsung bagagas bulik karna bakal barazaki ganal. Sampai di rumah, Palui langsung ka sumur babasuh batis, batampungas supaya kalihatan barasih lalu masuk karumah baganti baju nang hanyar.
“Sampiyan datang matan mana?” ujar Palui batakun.
“Ulun matan kuta ada nang handak dipanderakan,” ujarnya.
“Urusan bank itukah?” ujar Palui. “Kalu sual jaminannya kutanggung karna kami parak mangatam,” ujar Palui.
“Lain urusan bank atawa urusan jaminan,” ujar urang itu.“Lalu urusan napa?” ujar Palui.
“Urusan ulun sabujurnya kada panting banar tapi hanya handak batakun,” ujar tamu itu.“Batakun napa?” ujar Palui pulang.
Ulun handak batakun “di mana rumahnya Pak Haji Duraup?”
“Ooooo…… rumah Pa Haji Duraupkah? Itu nah di subalah sana parak langgar,” sahut Palui pina kaciwa.
“Ulun parmisi dan tarima kasih,” ujar tamu itu lalu tulak.
“Talalu-lalu banar tamu itu, hanya handak batakun rumah wak haji haja mangalihakan aku maninggalakan gawian di pahumaan,” ujar Palui gagarunum sarik wan anaknya.
“Salah sampiyan jua bah ai, karna tadi piyan bapasan minta kiyauakan bila ada uang nang mancari,” ujar anaknya kada hakun disalahakan. (rep/tam)
