Kisah Palui Disayat wan Dicucuki
Wayah pamulaan puasa nang paling kada panahanan diantara Palui sapakawanan adalah si Tulamak. Napa sudah kabiasaan makan lima anam kali sahari, dapatnya puasa lalu ai pina liut. Limbah partangahan puasa rupanya Tulamak sudah tabiasa, tapi ada kalakuannya nang kada baubah yaitu katuju mamanderakan makanan.
“Ikam paling katuju makan iwak masak apa Mak?” ujar Garbus mamancing.
“Kasukaanku adalah iwak papuyu babanam Bus ai. Di makan tangah hari wayah panas-panas limbah tuntung bagawi di pahumaan, sambalnya sambal lumbuk padas balimau kuit bagangan balamak kangkung wan kaladi,” ujar Tulamak pina bahihiut sambil bakipas-kipas kapadasan.
“Bubuhan ikam ini bapanderkah, baangan-angankah atawa bamimpikah?” ujar Palui nang hanyar datang umpat batakun.
“Kami mamander iwak masak napa nang paling nyaman dimakan,” sahut Tulamak.
“Bulan puasa ini kanapa mamander makanan?” ujar Palui.
“Kada maulah batal jua kalu,” ujar Tulamak.
“Ikam pang Lui iwak napa nang manurut ikam paling nyaman?” ujar Garbus.
“Sabujurnya aku paling katuju adalah iwak hayam babanam nang bacabut tulang, sambal padas wan kuahnya sop kantang,” ujar Palui.
“Iwak hayam itu haraganya larang Lui ai,” ujar Tulamak.
“Hi’ih, haraga hayam dasar larang Mak ai. Walaupun aku paling katuju makan iwak hayam tapi aku kasihan jua wan hayam Mak ai,” ujar Palui.
“Kanapa maka kasihan Lui?” ujar Tulamak.
“Kalu hayam dimasak opor, masak habang atawa dipanggang, sabujurnya aku katuju haja tapi aku kada sampai hati makan hayam nang diulah jadi sate,” ujar Palui.
“Kanapa maka kada katuju sate Lui?” ujar Garbus.
“Aku kasihan banar wan hayam, kalu ditatak dalapan atawa ditatak sapuluh sakitnya hayam kada sabarapa tapi kalu diulah sate ba-arti ditatak-tatak sampai halus limbah itu dicucuki ha pulang. Cuba ikam hitung saikung hayam bisa jadi saratus lima puluh cucuk sate.
Tiap cucuknya lima atawa anam hiris, jadi saikung hayam dicancang-cancang sampai 750 sampai 900 hirisan.
Kasihan hayam marasakan sakit Wan padihnya sampai ratusan sayatan lading landap,” ujar Palui bakirik pina kasakitan.
“Hi’ih-lah, bujur jua Lui ai” ujar Tulamak wan Garbus pina mandam muhanya kada bakumentar napa-napa.
