“Mak, Bus, aku umpat batakun adalah ikam malihat julakku liwat di sini tadi?” ujar Palui pina mahingal kauyuhan.
“Sabar Lui, duduklah dahulu ampihakan ngangal,” ujar Garbus.
“Napa pungkalannya Lui maka pina badadas-dadas,” ujar Tulamak.
“Tadi sudah kusambat bahwa aku mancari’i julak. Aku hanyar datang matan pahuluan lalu mambawai sidin bamalam di rumahku. Tadi imbah tuntung makanan lalu sidin kaluar saurangan, mungkin handak manukar timbaku,” ujar Palui.
“Kaya apa ciri-ciri julak ikam itu Lui?” ujar Tulamak.
Sambil taangah-angah kauyuhan, Palui lalu manggambarakan ciri-ciri julaknya itu. “Umur julakku itu kurang labih 50 tahun, rambut bahuban, sisingut putih, babaju piyama, awak gampal wan sidin babisul,” ujar Palui pina gamat banar manyambat, lalu langsung laju bajalan ampah ka simpang ampat.
“Nah, jelas ciri-cirinya Mak ai, tuha, gampal, bahuban dan sidin bisu,” ujar Garbus.
“Nah, di sinilah ngalihnya. Kita kada kawa manakuni sidin, kacuali mamakai bahasa isyarat bahasa bisu,” ujar Tulamak sambil manunjuk ada urang bajalan ampah ka warung.
“Ayu Bus, lakasi paraki wan takuni mamakai bahasa isyarat,” ujar Tulamak.
Garbus lalu bagamat mamaraki urang tuha itu, dicanganginya lalu sama-sama lihum. Garbus manyurung tangan basalaman. Imbah tuntung basalaman, lalu Garbus mambari isyarat batakun bujurkah sidin itu kaluarga Palui.
Julak Palui itu pina tanganga-nganga dipanderi bahasa isyarat. Bahanu sidin lihum lalu tatawa, lalu pina sarik, sambil baucap:
“Kurang ajar ikam ini mahuhulut aku kah, aku ini handak manukar ubat,” ujar julak Palui sambil bakacak pinggang sarik.
“Maaf Lak ai, kami manakuni sampiyan ini, bujurkah julaknya Palui karna tadi Palui mancari’i sampiyan dan dipadahakannya bahwa sampiyan bisu,” ujar Tulamak minta maaf karnamarasa salah.
“Bangsat jua kamanakanku itu mamadahakan aku bisu,” ujar julak sambil manunjuk Palui nang mamaraki sidin. “Ikam bangsat jua Lui ai mamadahakan aku bisu, lalu aku dipanderinya bahasa isyarat,” ujar julaknya makin sarik.
“Ampun maaf julak ai, ulun sama sakali kadada mamadahakan sampiyan bisu, cuma tadi ulun ada manyambat bahwa julakku itu babisul,” ujar Palui.
“Kalu kaya itu ikam badualah nang tuli, pampat talinga kada mandangar ucapan Palui. Dipadahakan Palui bahwa aku babisul lalu ikam dangar bisu,” ujar julaknya Palui sarik manumpalak bubuhannya sambil balenggang bulik ma-arit bisul.
