Kisah Danling Atawa Lingdan
Kampung Palui sudah babarapa bulan ini kada aman karna magin banyak urang balapur kamalingan. Makanya, tugas jaga malam dan kamling nang dahulu sawat diampihi diadaakan pulang.
“Karna tugas kamling ada lagi maka batambah lagi jua razaki kita,” ujar Garbus.
“Ikam itu talalu baharap wan pambarian urang, itu sama artinya tugas kamling dijadiakan pancarian,” ujar Tulamak.
“Kada usah bapadah harat Mak ai, satiap tugas kamling justru ikamlah nang paling banyak mambantasnya. Ikam tabanyak guring di gardu daripada bakuliling,” ujar Garbus kada hakun disalahakan.
“Aku banyak di gardu itu karna akulah nang ditunjuk jadi kumandan.
Kumandan harus disiplin kada bulih maninggalakan tugas dan harus tatap berada di markas,” ujar Tulamak.
“Kanapa maka ikam mangaku kumandan Mak. Nang ditunjuk jadi kumandan adalah Palui. Itu Paluinya datang,” ujar Garbus manunjuk.
“Palui itu kada kumandan tapi danling alias kumandan bakuliling, amun aku kumandan pasukan artinya jabatan Palui itu masih di bawah aku,” ujar Tulamak.
“Hurmat Danling, lapuran…. Imbah bakuliling tadi aku manarima lapuran warga bahwa ada nang kahilangan kain gurdin lawang,” ujar Garbus balapur.
“Kalu maling masuk rumah kukira kada, cuma kain gurdin lawang nang dicuntannya musti barang nang labih larang kaya tivi, radiu, jam, pakaian atawa duit,” ujar Palui.
“Mungkin haja kain itu nang dikatujuinya karna mudel hanyar lalu wayah masuk rumah langsung kain gurdin itu nang dicuntannya,” ujar Garbus.
“Takuni lagi Bus urang nang kahilangan itu, catat pabila dan dimana hilangnya?” ujar Tulamak umpat manyuruh.
“Ini ada catatannya, hilangnya kamarian ahad, haraganya larang dan babalang-balang pucuk rabung. Kalu kada salah tadi dipadahakan mudelnya kaya kain nang dipakai Wadanling ini,” ujar Garbus manunjuk baju Palui.
“Kalu sama wan baju Danling, maka kada salahnya kita aduakan ka pulisi gasan diadakan pamariksaan,” ujar Tulamak mancurigai Palui.
“Takuni Bus sakali lagi dimana hilangnya? Kada mungkin kain gurdin bagantung di lawang bisa hilang,” ujar Palui.
“Manurut pangakuan nang kahilangan, hilangnya di jamuran, wayah ditapas,” ujar Garbus.
“Bangsat! mambari supan mamarina haja,” ujar Palui manyumpah.
“Kanapa Danling? Ada parintah napa. Saya siap manjalanakan parintah,” ujar Garbus pina sarius.
“Kada napa-napa,” ujar Palui pucat karna malihat kakawalannya pina curiga.
“Kain bajuku ini adalah pambarian kamanakanku, kaina kucek wan inya dimana manukarnya,” ujar Palui mambuang supan langsung bulik karna kada hakun disalahakan.
“Naahhhh… parak katahuan mangilnya, antara dua haja amun kada kamanakan Palui nang tarsangka utamanya atawa….” ujar Tulamak bamandak lalu mancangangi Garbus.
“Atawa Palui saurang nang jadi oknumnya,” ujar Garbus manyambung lalu bacacangangan wan Tulamak.
“Amun bujur Palui urangnya baarti jabatannya itu sudah tapaling,” ujar Tulamak pulang.
“Tapaling nangkaya apa Mak,” ujar Garbus kada paham.
“Maksudnya tapaling itu jabatan Palui tadi lainnya Danling atawa kumandan kuliling tapi tabalik jadi ‘Lingdan’ alias Maling Dadaian atawa maling jamuran,” ujar Tulamak baulah singkatan hanyar.
