Baisukan Palui tulak manyaru bubuhan urang kampung, inya handak mahaul abahnya. Matan ujung hulu sampai ka ujung hilir, dikatukinya rumah urang saikung-saikung amun kada sampai sarunya inya kada bulik ka rumah tu pang.
“Pabila Lui?” ujar Tulamak wan Garbus tapaimbai manakuni.
“Kaina imbah isya. Imbah bulik matan langgar langsung haja ka rumah lah,” ujar Palui.
“Pas banar nah, imbah isya itu pas lapar-laparnya apalagi bini unda wahini pina jarang banar bamasak. Napa jar iwaknya Lui?” ujar Tulamak pina cagat talinga mandangar cagar bamamakan.
“Iwaknya daging Mak ai, pokoknya kena sakahandak ikam mangautnya,” ujar Palui pulang.
Limbah isya urang datangan ka rumah Palui, tamasuk bubuhan kakawalannya barataan. Kada lawas pa haji Jali mamimpin acara haul, imbah mambaca yasin tadangar sidin mambaca doa haul sakaligus manutup acara haulnya
“Nah nang ini nang kita tunggui,” ujar Tulamak sudah kada sabar lagi.
“Gani’i Palui basusurung dahulu Mus ai, jangan langsung manangkup “: ujar Garbus managur.
“kacauannya badahulu disurung, hanyar iwak lawan nasinya,” ujar Palui mamadahi bubuhannya.
“Napa makannya nih pina bagangan waluh?” ujar Tulamak maitihi kagangan waluh surungannya.
“Surungi haja dahulu mak ai, tu cacapannya lawan iwaknya jangan katinggalan” ujar Palui manyuruh Tulamak manyurungi iwaknya.
“Iwaknya ni pina bahiris hiris kaya daging pang, tapi cucuklah daging wan gangan waluh?” ujar garbus manjapai-japai kahirisan iwak.
“Itu daging nang paling harat bus ai, makanya lamah. Amun urang kuta katuju banar makanan kaya ini, stik daging gangan waluh, “ujar Palui manarangakan.
“Nang sudah langsung haja makani, kada usah basupanan,” ujar Palui manyuruhi bubuhan hadirin makanan
“Rasa suah aku makan daging nang ini,” ujar Tulamak pina curiga.
“Ini rasanya kaya mandai, bujurlah mak?” ujar Garbus menambahi.
“Dasar mandai bus ai, itu bawaan julakku matan Amuntai sana,” ujar Palui kakalikik tatawa.
“Bah iya am,di bunguli Palui kita Bus ai, bapadah daging satik… sakalinya mandai,” ujar Tulamak kakalahan.
“Bujur haja daging Mak ai, tapi daging mandai…,” ujar Garbus gagarunuman jua.
