Kisah Palui dan Burung Pipikau
Taungut Palui malihat kalakuan anak nang karas hati. Maski rancak ditagur, ditangati jangan balajuan basapida mutur, inya tatap kada maasi. Akhirnya baurusan wan pulisi jua ai.
”Anakku handak ka Rantau kada sapangatahuanku Bus ai. Bahelm kada, basim balum kawa lagi baulah karana masih di bawah 17 tahun. Jadi pang pas pulisi razia, sangkut inya kana tilang, kadada ampun lagi ai,” Palui marista ka Garbus.
“Damintukah Lui. Banyaki basabar sambil badoa tiap habis salat Lui ai. Mudahan anak ikam pamaasian, bakti wan kuitannya,” sahut Tulamak kada asaan mamadahi.
“Tarima kasih Mak ai, ada nang mamadahi. Jadi ada jua aku pegangan. Rasa nyaman pahinakan, bila aku ada nang mambari nasihat ini nah. Kalau urang lain bisa sarik dipadahi, tapi kalau aku batarima kasih banar Mak ai,” Palui kawa lihum.
Karana asa nyaman pahinakan, bini di rumah sabar banar jua inya mahadapi problem anak, maka Palui ada tapikir handak bailang ka rumah tuan guru Hamawang Padang, nang rajin babacaan di Masjid Nurul Iman.
Singkat kisah Palui dipadahi sidin, disuruh mancari burung pipikau. Hatinya jar sidin dimakanakan ka anak nang karas hati nitu, Insya Allah hati nang karas jadi lamah.
”Aku ne kada pamburung pang Lui ai,” ujar sidin nang maulah lihum Palui.
”Dasar bujur guru lah, pian tahunya babacaan dari masjid ka masjid haja, jadi sangat kasibukan jua, tentunya kada kawa jadi pamburung. Iyakah guru?” Palui manyahuti.
“Dasar bujur Lui ai, aku dasar kada kaawakan, apalagi jaka dihakuni tarus. Bulan maulid tadi, baisukan, siang, kamarian sampai malam ada nang manyaru kada saling pagatan, dimapa aku handak baistirahat. Wan kaluarga bisa kadada waktunya lagi,” sahut sidin sarius.
“Nitu tadi guru, burung pipikau dimana mandapatinya?” takun Palui pula.
“Umpat manukar wan pamburung atau manjipah saurang di pahumaan. Burungnya mirip wan burung puyuh, tapi wayah ne cacariannya ngalih banar Lui ai,”ucap sidin mamadahi.
“Ulun kena batakun ka urang nang suka manjipah burung, mudahan ada haja lagi nang ngaran burung pipikau nitu,” sambat Palui sambil baucap parmisi ka guru, mancium ka tangan sidin.
Batakun Palui kapada urang nang suka mancari burung, adakah manjipah burung pipikau? takun Palui.
“Burung pipikau wayah ne ngalih banar cacariannya Lui. Kalu burung puyuh banyak banar am,” sahutnya.
“Aku handak burung pipikau,” ujar Palui tagas banar.
“Pipikau nitu ada di muha ikam saurang Lui ai. Pipi kau artinya pipi ikam iyakah?” ujar panjipahan burung tatawa.
“Bah iya pang, aku dasar bujur mancari burung pipikau, bukannya pipi ikam pang! Ini sarius tahukah,” Palui manumpalak.
“Ayuja isuk aku bahimat mancariakan burung pipikau nitu, sampai dapat. Bila kadada jua pipi ikam nang kusayat,” sahutnya habang muha.
“Mudahan dapat burung pipikau ikam te isuk,” ucap Palui manggamati.
Isuknya dihadang kada datang, sampai talu hari dihadang kada saling datangan jua urangnya, akhirnya Palui taungut pulang inya. Nang anak makalahan am, tatap haja balajuan basapida mutur, kada jaranya ditilang pulisi. Cubaan ikam Lui, tibah di anak. Suruh ka sirkuit Balipat Binuang haja Lui ai anak ikam.
