Kisah Palui dan Batu Kacubung
Salawas dapat bagian warisan matan kayinya Tulamak pina bapakaian banar. Baju salawar saraba hanyar, pakai galang jam. Bahkan kada lawas tadi inya bakakalung amas. Ujarnya mamakaiakan ampun bini.
“Mak ui Tulamak, lalakian itu kada bulih pakai amas, haram. Parhiasan amas itu dihususkan gasan bibinian,” ujar Palui.
“Tapi kanapa maka ikam mamakai utas Lui?” ujar Garbus.
“Utasku ini lain amas tapi utas sawasa alias wasi putih,” ujar Palui.
“Kukira Lui ai lalakian kada bulih mamakai utas amas itu karna kada kawa manukar,” ujar Garbus.
“Biarpun urang sugih dan banyak baduit wan kawa manukar amas bakilo-kilo tatap haja kada bulih mamakai parhiasan amas, haram hukumnya,” ujar Palui.
“Kalu parmatanya bulihlah lalakian mamakai intan barlian,” ujar Tulamak.
“Bulih haja Mak ai tapi haraganya nang larang. Karna larang maka banyak lalakian mamakai mata utasnya adalah kacubung, akik, jambrut, red borneo, macam-macam janis batunya,” ujar Palui.
“Mata utas ikam itu napa ngarannya Lui, pina langkar banar balangnya?” ujar Garbus manjapai utas Palui.
“Parmata utasku ini anih banar ngarannya Bus ai. Ngarannya adalah kacubung purnama bila malam wan kacubung matahari biru bila siangnya,” ujar Palui.
“Hau kanapa maka babida-bida ngarannya?” ujar Tulamak.
“Aku kada parcaya Lui ai. Kalu ngarannya batu kacubung ya batu kacubung, kada mungkin babida-babida antara siang wan malam. Napa buktinya Lui?” ujar Garbus manggasak.
“Buktinya, malam bulan purnama bila permata kacubungku ini diteropongkan ke bulan pasti kalihatan purnamanya. Kaya itu jua siang bila batu permata kacubungku ini diteropongkan ke matahari pasti biru warnanya,” ujar Palui sambil lihum manating-nating utasnya.
“Wah, waahhhh… dasar Palui tukang haluya, kalu bulan purnama atawa siang, jangankan batu kacubung, sandal gapit gin bila ditating ka bulan purnama atawa kamatahi pasti kalihatan bulan wan mataharinya,” ujar Garbus mahual kada hakun kalah jawaban kasak Palui.
