“Mamandir masalah kahidupan masyarakat kita, mantan dahulu sampai ka wayah ini, kada habis habisnya,” ujar Palui wayah umpat marutit di gardu jaga.
“Itu bujur pang “sahut Garbus. “kita-kita ini hanya sahibar mandir. Kita ingat bencana banjir, bencana kakaringan, gampa bumi, lumpur Lapindu, bencana Karismon (Karisis Munitir) wan macam-macam kasulitan hidup lainnya, tamasuk jua kasulitan duit palsu, kada kahitungan banyaknya.”
“Kita ini patutnya angkat tupi, salut kepada pamarintah nang sudah barusaha maksimal, tapi macama-macam kasulitan rakyat ini baluman bahasil, di nikmati ulih kita,”ujar Garbus pina pancar bapandir nang kaya calum anggota DPR.
Tulamak wan Tuhirang hanya ungut-ungut maiyakan, sambil bagawilan.
“Mudahan haja-ah kita jangan batambah sakit, kasulitan raskin, BBM, kasihatan wan lain-lainnya, mudahan barahir,” ujar Tuhirang bagimit.
Garbus baucap pulang; “kaina kada lawas lagi,kita ini cagar bacucukan di Pamilu. Mudahan kita jangan dilanda kasulitan lagi,” ujar Garbus sarius.
“Mun aku kada sombong pang,” ujar Palui sambil mambagi ruku sabilah saurang kapada Garbus, Tuhirang wan Tulamak, langsung malikitkan wan kurik api.
“Aku masa kanak-kanak parnah tataguk duit sarimis dan tamakan. Aku tataguk kada singaja. Tapi sampai tuha ini aku kada parnah kasulitan duit,” ujar Palui baagak.
“Ah…itu tarang pada siang Lui-ai. Karena Katua RT kita ini kada mangunyah atawa mamamah duit, sahingga inya kada kasulitan kartas duit. Paling kada inya hanya kasulitan tulang iwak wan tulang ayam,” ujar Garbus.
Nang lainnya badarau tatawaan. “Nitu ngarannya padir ma Halabiu, Lui-ai,” ujar Tulamak. Maka manjadi ramailah pamandiran hal mamakan duit itu ka sual duit suap, duit suguk, duit korup, duit riba, duit halal, duit haram dan lain-lain.
“Itu kaina kita takunakan warga Tuan Guru,” ujar Palui.
“Kita jangan bapardir layau nang kaya bakamih di lantai. Ayo,kita satop hingga ini haja. Ampihan kita manguya manyindir urang pamali wallai,” ujar Palui.
“Kita ampihan barungkis wan bacakut. Baiknya kita ka warung Acil Inur, di situ kita bisa kasulitan pais atawa dadar gulung, tapi kawa haja di kumur-kumuri wan banyu tih is. Kaya apa?
“Akur saratus parsin” sahut Tulamak, mahancap mamuruk sandal batitikan liurnya.
