Kisah Palui dan Banyu Pauduan
Ujar tuan guru bacaramah di langgar bahwa apa haja nang digawi gasan kabaikan urang banyak salawas bulan puasa ini banyak banar pahalanya. Umpamanya mambarasihi langgar atawa di masigit, mangganii bamasak gasan pabukaan, bagarakan sahur, umpat manulungi bubuhan amil-zakat di hari raya wan lain-lainnya. Gasan nang sugih baisian duit atawa harta baiknya ba-amal sadakah. Ba-amal gasan langgar, masigit, gasan pasantren wan gasan anak yatim salain kawajiban bafitrah wan bazakat.
“Aku ini taumpat jua nang mandapat hak bagian zakat fitrah, karna aku matan halus sudah yatim piatu,” ujar Palui.
“Kalu kaya itu, aku dapat bagian jua karna sudah puluhan tahun ini aku jadi mualaf,” ujar Tuhirang umpat bapander.
“Kalu sual bagian zakat atawa fitrah kita jangan manuntut karna ada urang nang labih lagi mamarlukannya,” ujar Tulamak.
“Kami kada bujuran, panderan sambil bagaya haja Tulamak ai, sambil mahadang manjarang banyu gasan pabukaan puasa,” sahut Palui.
“Kaya apa parsiapan pabukaan nang lainnya, habarnya H.Duraup ada jua mambari kurma,” ujar Garbus.
“Dasar kaguguran andaru bila H.Duraup mambari kurma, samalam haja wayah babuka di wadah sidin sabigi kurma gasan urang badua,” sahut Tulamak.
Imbah tuntung baistigfar sampai jamnya, langsung bubuhan kakanakan mancatuk dauh, lalu bukaan sa langgaran.
“Lui, kanapa banyu tehnya asa hanta, asa masin kada kaya biasanya sigar nyaman,” ujar Garbus batakun.
“Cuba ikam cek kaina kalu pina kada manggurak karna api kumpurnya mati kahabisan minyak. Amun samunyaan jamaah sampai sakit parut ikam nang batanggung jawab,” ujar Garbus pulang.
“Kumpurnya baik haja, minyak gas nya hanyar diisi kaya itu jua sumbu-sumbunya samunyaan hanyar dibarasihi,” sahut Palui.
“Ayu ingatan lagi kanapa maka banyu teh pabukaan ini kada nyaman,” ujar Garbus.
Palui sambil bapikir, tadi inya nang mahidupi kumpur lalu manjarang banyunya sampai manggurak banar. Inya ingat nang maisi cucut jarangannya adalah Tuhirang, lalu ditakuninya : “Rang….tadi siapa nang maisi banyu cucut jarangan?” ujar Palui manakuni Tuhirang.
“Kaya biasa jua aku nang maisinya,” sahut Tuhirang.
“Banyu apa nang ikam isiakan,” ujar Palui.
“Ikam tahu saurang matan subuh tadi banyu liding di langgar kita mati, gasan baudu haja ngalih. Makanya tadi aku maambil banyu gasan dijarang itu matan kulam pauduan ini,” sahut Tuhirang.
“Astagfirullah…… jadi kita tadi tanginum banyu matan kulam pauduanlah?” ujar Garbus.
“Kulam pauduan itu gasan baudu batampungas babasuh muha, babasuh tangan, batis wan sagalanya ai.”
“Bujur haja pang syah gasan baudu karna ukurannya cukup 20 kulah (balik), tapi asa kada cucuk gasan di nginum,” ujar Palui.
Mandangar bubuhannya rami bahual sual banyu, baparaklah Pambakal Tuha lalu batakun, napa nang ikam panderakan ujarnya.
“Kalau sual banyu itu karna sudah talanjur kada apa-apa asal haja tadi manjarangnnya bujur-bujur masak,” ujar Pambakal.
“Alhamdulillah kada apa-apa…….. apalagi tadi aku manjarangnnya manggurak sampai ampat-lima kali gurakan,” ujar Palui kada hakun kalah.
