Kampung Palui tapilih jadi kampung nang paling bahasil malaksanakan KB. Angka kalahiran halus banar bahkan manurut BKKBN tamasuk partumbuhan nol. Karna kabarhasilan itu maka pambakal maadakan syukuran, macam-macam acaranya tamasuk hiburan.
“Kira-kira napa panyababnya maka kampung kita KB-nya bahasil ?” ujar Palui manakuni pambakal Idum.
“KB dikampung kita bahasil karna bubuhan panyuluh KB rajin banar siang malam ma-adakan caramah, panyuluhan dan tamasuk jua panataran-panataran” ujar pambakal.
“Ulun kira kada itu alasannya pambakal ai” sahut Palui.
“Lalu alasan ikam Lui ?” ujar Garbus balik batakun.
“Alasan KB dikampung kita bahasil karna listrik padesaan banyala samalaman, jadi bubuhan Garbus wan Tulamak tamasuk sampiyan pambakal ai banyak nang kawa digawi umpamanya manuntun tivi, mandangarakan radiu, bajahit atawa manyulam. Makanya kada tapikir lagi manggawi nang samacam itu, kada sama wayah lampu rancak pajah maka gawian kada lain mangguliming umanya” ujar Palui mangalakak tatawa.
“Kami siap pambakal ai, acaranya malam ahad kaina” ujar Palui wan kakawalannya sambil manyiapakan panggung wan hiasannya.
Imbah tuntung acara sambutan-sambutan maka wayah acara hiburan, pambakal mangiyau Palui supaya inya mamulai banyanyi.
“Lui, ikam baduit-lah ?” ujar pambakal Idum.
“Gasan napa baduit banyanyi pambakal, apakah gasan dilelang suara lalu duitnya gasan mambangun titian” ujar Palui.
“Ini kadada urusan bajual suara Lui ai, tapi ikam baduit wan kakawalan ikam jua Garbus atawa wan Tulamak” ujar pambakal.
“Bubuhannya itu kada panduitan pambakal ai, jangan saribu atawa dua ribu, ruku haja maminta wan ulun” ujar Palui.
“Pokoknya ikam banyanyi baduit” ujar pambakal mangarasi.
“Kalu banyanyi baduit, biar kada jadi ulun hakun haja” ujar Palui umpat mangarasi.
“Napa nang dihualakan pina bakakarasan ?” ujar katua RT nang hanyar datang umpat batakun.
“Ulun dipaksa pambakal supaya banyanyi baduit, itu tamasuk pungli alias KKN” sahut Palui.
“Ikam salah tarima Lui ai, pambakal manyuruh ikam kadanya banyanyi wan duit atawa babayar tapi banyanyi badua wan kawal ikam nang istilahnya adalah baduet. Jadi maksudnya baduet kadanya baduit” ujar katua RT manjalasakan.
“Ooooo…… itukah maksud pambakal tadi, ulun kada paham. Ampun maaf karna ulun kira baduet wan baduit itu sama haja, sakalinya babida tulisannya tapi sama sambatannya” ujar Palui paham sambil mancium tangan pambakal dan wayah basalaman itu Palui lihum manarima amplup salam tempel pambakal.
