Kisah Palui dan Azan Tangah Malam
SALAWAS bulan Rabiul Awal ne rami buhan tukuh agama, qari barjanzi,, qari syair maulid lainnya wan masyarakat, saruan maulid, baik baisukan, siang maupun malam. Karana banyak nang saruan kaluar kampung nitu, maka dampaknya masjid karinah puang.
”Napa Lui batalu kita haja nang salat Isya di masjid naya?” takun Garbus.
“Siapa nang jadi imam, aku sudah azan wan iqamatnya,” sahut Palui.
“Ikam Lui ai jadi imam, kaum masjid labih tahu bacaannya pada kami badua,” ujar Tulamak . Garbus kada hakun jua jadi imam. Palui bagamat maimami salat Isya.
Malam isuknya Palui azan salat Isya pulang, tarnyata kadada satu pun nang datang ka masjid. ”Kamanaan urangnya?” Palui gagarunum, masjid ganal urangnya nihil. “Ayuja artinya aku sudah bausaha, sudah batugas sabagai kaum masjid, sabagai muazin mamanggil manusia supaya ka masjid, nyatanya nol,” Palui kada kawa mambuang inya tatap gagarunum.
Imbah nitu Palui bulik ka rumah, dirawa bininya. ”Napa abahnya pina masam muha ada apa?
Babarapa malam ne kadadaan urangnya di masjid terutama salat Isya, jadi aku asa sangkal umanya ai!” sahut Palui.
“Soal salat Isya bajamaah, nitu tasarah urang haja, handak ka masjidkah, atau salat di rumahkah, kada bulih kita mamaksakan kahandak!” nang bini malawanakan urang kada ka masjid.
“Aku te sayang masjid kita nih, bagus banar wan ganal masjidnya, tapi jamaahnya kusung-malumpung, nitu haja pang. Bapintaan gigih gasan mambangun masjid, tapi memakmurkannya kuler, ada apa lalu ya te!” sungut Palui, mandam haja nang bini.
Manumpahkan kekesalan hati si Palui, inya turun jam dua belas, tangah malam manuju masjid, mambuka mik kemudian azan: Allahu Akbar… sampai seterusnya datang urang-urang ada nang basilawar handap, babaju singlet haja, batapihan disandang di atas bahu,, garahukan manuju masjid managur Palui.
”Napa maka azan tangah malam ada apa Lui?” tagur Pak Jalu, tukuh warga setempat nang tarkenal jagau sambil menenteng parang manuju masjid, ada apa gerangan azan tangah malam!”
“Sabar dahululah, aku jalasakan, tiap malam aku azan pukul 7.30 kadada saikung pun nang datang ka masjid, talu malam baturut-turut naya, sabalumnya ada pang Garbus wan Tulamak jadi makmum salat Isya, kamanaan buhan pian ne! Siapa nang bungul akukah, buhan piankah? Napa maka datangan aku azan tangah malam!” ujar Palui.
“Kami saruan maulid tarus babarapa malam ne Lui ai, jadi urangnya kaluar kampung, makanya kadadaan nang ka masjid waktu Isya,” sahut Pak Jalu pina sarik.
“Aku kesal banar, kadada nang datangnya ka masjid, tamasuk Garbus wan Tulamak kada datang lagi talu malam, makanya baik aku azan tangah malam, banyak banar nang datang ka masjid, siapa nang bungul! Saruan maulid kalu nitu alasan haja? Padahal, asyik bahampas buyang di gardu,” Palui manumpalak.
“Bah iya haja sudah ikam ne Lui lah? Aku kira azan tangah malam ada nang kasulukutan kaya di kampung Loklua , dua buah rumah habis mandah, atau ada nang karampukankah warga kita di kampung ne!” ujar Pak Jalu garigitan banar ka Palui.
Tapi akhirnya lakas bubaran buhannya, kalah dapat akal Palui. Garbus wan Tulamak lihum haja pang, kadada bakumentar, kawal Palui naya sakalinya.
