Kisah Palui dan Arba Paampihan
BIASA habis salat Dzuhur Palui kembali manarik bentor mangkal di terminal pasar kuta dudul, tapi Arba paampihan di bulan Shafar atau Arba mustamir jar urang hulu sungai, inya istirahat bausaha.
”Napa abahnya, pian babaju muslim handak saruan ka mana?” takun nang bini.
“Kada tahu lagi ikam ya, aku handak ka masjid acara doa barsama, dalam rangka tulak bala, hari Arba paampihan di bulan Shafar naya,” sahut Palui.
“Maksudnya kabalaankah banua kita naya?” anyak nang bini.
“Di hari Arba paampihan ne, banyak tuan guru mamadahakan, diturunakan bala 320 ribu, ka saluruh dunia, tamasuk ka banua kita, jadi pang parlu banar, kita badoa barsama tulak bala, salat tulak bala, mambaca yasin, baistigfar, besalawat, betahlil, imbah nitu hanyar salat Asar,” jalas Palui.
“Ayuha pian ka masjid, ulun kadatangan tamu lagi, jadi kada bulih ka masjid, paham haja kalu pian?” nang bini lihum.
Palui lakas ka masjid, rami sudah takumpulan di masjid Palui sapakawalan, Garbus wan Tulamak, kawa manyampatakan waktu di masjid malaksanakan ibadah satahun sakali.
”Supaya jangan turun bala, di antaranya jangan maidolakan artis, tapi idolakanlah nabi kita, nabi Mauhammad SAW,” ujar tuan guru betausiah.
“Banyak-banyak baisitigfar, besawalat, salat fardhu jangan sampai ditinggalakan, wan laksanakan basedekah sasuai kamampuan, karana sadekah nitu tamasuk tulak bala jua, tuan guru sarius banar mamadahi jamaahnya. Bala-bala nang ganal, mudahan kita dijauhkan, saparti gampa bumi, tanah lungsur, banjir bandang, tsunami, gunung api malatus, narkoba, obat-obatan tarlarang, wan lain-lain bala, tuan guru betausiah, banyak nang manangis, tamasuk Palui gin umpat basah jua muhanya akibat manangis,” ungkai tuan guru.
Imbah tuntung baibadah nitu, tuan guru manyuruh jamaahnya bila handak banyu tuan guru ambil haja di tung atau ember nang sudah disadiakan, tapi jangan barabut, nang tuha didahulukan maambilnya.
Lakas Palui manuang banyu di ember nitu ka dalam butul banyu mineral.
”Lui ikam napa maka maambil butul banyu mineralku? Nitu nah ada tulisannya Utuh Putih,” sarik Utuh Putihnya diambil Palui butul banyunya.
“Aku tadi kada ingat mambawa butul banyu, jadi pang taambil ampun ikam, aku kira ikam kada handak banyu tuan guru,” Palui bakilah.
“Bah iya pang Lui ai!” Utuh Putih begaru kapala.
Palui bisa maakal, batul banyu urang diambilnya, habis Utuh Putihnya bulik badahulu.
Palui manuntum ka banyu tuan guru sampai habis imbah nitu mangaut lagi inya, minta gasan anak bini di rumah.
”Uh Lui sadang sudah, nang lain kena kada kabagian?” tagur Garbus.Tatawaan urang-urang lainnya malihat tingkah Palui kada tahu supan? Tampulu Lui lah, banyu tuan guru satahun sakali hanyar taminum.
