Kawal Palui nang saikung ngini, Si Tulamak mimang lain dari nang lain. Makannya gancang banar, sasar hari awaknya sasar babangkak. Kada salah kalu abah umanya mambari ngaran Si Utuh Lamak sasuai haja wan parawakannya nang ganal basar.
Tapi dari sabarataan makanan nang dikatujuinya adalah wadai apam. Inya paling baliur kalu malihat apam. Amun makan cagar habis bapuluh-puluh biji tu pang.
Hari ini Palui wan Tulamak tulakan ka pasar ganal, baistilah handak mamakan apam batuhuk. Di pasar, di wadah husus pawadaian, bubuhan panjual apam bajijir mahadang nang manukari.
“Ayu Mak kita bacari bangku gasan kadudukan,” ujar Palui. “Hari ini ikam tasarah pilih apam napa haja nang handak ikam makan. Samunyaan aku nang mambayari,” ujarnya pulang.
“Pamulaan aku handak mamakan apam batil,” ujar Tulamak handak titik liurnya. “Tambahiakan gula habangnya cil ai.” hancap Tulamak manyuap sambil badangkak.
Kada sawat satangah jam, Palui wan Tulamak sudah mahantup bamacam-macam apam. Mulai apam batil, apam banyiur, apam putih wan habang, apam paranggi, apam sagu, apam talipuk, wan apam Barabai. Sampai bubuhannya dua talu kali mariga kakanyangan.
“Tulung Mbui, bungkusakan apam Barabai 3 bungkus gasan nang di rumah. Salajur hitungakan nang sudah kami makan tadi,” ujar Palui sambil manjulung duit ratusan ribu rupiah.
“Anu Mbui, masih adakah apam e……….ee……,” ujar Tulamak batakun.
“Apam napa lagi nang lain?” ujar umbui Saudah kada paham, karna sudah samunyaan jualannya dirasani bubuhannya.
“Anu…… apam barabah mbui ai,” ujar Tulamak maksudnya handak manggayai Umbui Saudah.
“Hauu… kurang ajar ikam lah!” ujar umbui Saudah, langsung sidin maambil bakul lalu dihamputakannya ka muha tulamak.
“Aku urang Pamangkih sudah sabaharian bajualan apam Barabai. Amun ikam handak apam barabah, bantas nang di rumah,” ujar sidin bamamai banar.
Malihat Umbui Saudah kasasarikan Tulamak baundur handak bukah, tapi batisnya tabarusuk ka lubak.
Inya tarabah tatilantang, awaknya nang lamak itu hibak wan lucak, parcis nangkaya hadangan kalang nang bakubang di Sungai Buluh.
Urang-urang di pasar gigir manawaakan tuntunan garatis. Palui taumpat supan. Hancap inya mamaraki Umbui Saudah.
“Ulun maintaakan maap gasan kawal ulun itu. Kalu inya katalaluan muhun diampunakan, karna maksudnya handak bagayaan haja,” ujar Palui bagamat mambisiki Umbui Saudah. Imbah maminta maap Palui parmisi bulik sambil mangganding Tulamak nang takuringis kasakitan. Awaknya rigat hibak wan licak.
“Makanya Mak ai, kalu bagaya nang pina mancarobo, balihat dahulu wan urangnya,” ujar Palui umpat manumpalak.