Kisah Palui dan Anak Pangulu
SABAN kamarian Ahad, wayah ne Paman Usai rajin lewat di muka rumah Palui. ”Uh Paman Usai kamana pian tiap kamarian Ahad naya mambawa tas disandang di bahu?” takun Palui.
“Aku Lui ai, salawas imbah kawin wan anak pangulu, rajin manuntut ka tuan guru ampah ka gunung Madang situ,” ujar sidin.
“Mangaji napa pian paman rajin banar ulun lihat?” lanjut Palui.
‘Fikih, tauhid, tasawuf, nitu pang Lui ai, gawian habis bajualan iwak,” ucap sidin asa suka.
Kemudian Garbus mandangar, baucap ka Palui, ”Baiknya Lui ai, ikam umpat jua ka pangajian manuntut ilmu?”
“Ayuha Bus ai, doakan aku, mudahan tabuka hatiku handak ka pangajian kaya sidin jua,” Palui lihum saurangan.
Imbah makan malam takumpulan Palui wan anak bininya di rumah. ”Uh umanya aku asa bahiri wan Paman Usai,” sambat Palui.
“Napa nang dihiriakan abahnya?” takun nang bini. “Babini anumkah pian handak jua kaya sidin?”
“Kada kaya nitu pang umanya ai, saikung ikam naya gin ibarat makanan kada habis aku mamakannya, ditambah nasi sapiringlah pula,” Palui bisa bapribahasa.
“Jadi napa nang dihiriakan ya?” takun lagi nang bini pina takulibi.
“Abah handak babini anum, Ma ai?” sahut nang anak.
“Uh Mat, jangan kaya nitu muntung ikam!” Palui manciling ka anak.
“Sudah abahnya, jangan tapi belawanan badua beranak,” sahut nang bini.
“Kaya ne umanya, aku jar Paman Usai jua pang, sidin himung wan bini sidin nang hanyar naya, masalahnya bila kamarian Ahad, nang bini manyuruh banar supaya sidin nitu rajin mandapati guru balajar manuntut ilmu agama ampah ka gunung Madang, padahal rumah sidin di Sungai Jarum, Bangkau situ, jauh banar kalu ma lima belas pal labih. Sidin himung banar baisi bini nang tahu jua pantingnya manuntut ilmu,” ujar Palui sambil mamanasi ka bini.
“Kaya ini haja abahnyalah, bila kamarian Ahad bapadah minta singgahi wan Paman Usai, jadi sama-sama tulakan manuntut ilmu, pian wan sidin, bagus kalu?” saran nang bini.
“Bujur, Bah ai, jar mama,” sahut nang anak.
“Sama haja abahnya ai, ulun gin baik jua kalu, karana mau manyuruh pian manuntut ilmu nitu?” nang bini kada mau kalah.
“Ayuha aku laksanakan suruhan ikam umanya ai kamarian Ahad dihadap,” ucap Palui sambil manyirit ka bini.
“Bagus abahnya ai pian? Tapi jangan babini anak pangulu jualah, bayanya am, ulun jadi bini tuha, indah abahnya ai ulun bamadu,”nang bini mangibit ka laki.
“Akai…akai… umanya nah?” Palui sakit kasukaan sakalinya.
Rami hidup berumah tangga nitu ya. Lakasi ha nang bujang-bujang bila mampu kawin haja, siapa jua nang dihadang, handak kawin wan anak pangulu kah. ”Makanya kumpulakan duit dahulu, hanyar kawin?” Palui gagarunum.
“Apa-apakah abahnya nih?” bini Palui manyirit ka laki. Paham haja kalu si Palui.
