Palui ahirnya kawa jua mangawini gadis pilihannya, biar malalui jalan panjang, penuh parjuangan dan tantangan karna calun mintuhanya kada katuju. Tapi biar kaya itu Palui kada kurang-kurang akal. Macam-macam cara digawinya hingga biarpun balum malamar, balum nikah, balum ditarima, inya saban malam jumahat kawa haja batamuan.
Partamuan rahasianya ini balangsung batahun-tahun hingga kuntang-kantung kaya sudah laki bini haja. Dimana pertemuannya? Kada lain di wadah urang babacaan karna di sana pasti banyak muda mudi nang datang. Di rumah minta izin mahadiri pangajian tapi nyatanya bagagandakan. Barakat cangkal itu ahirnya Palui kawa jua mangawini si Zaleha anaknya Wak Duraup.
“Pian cangkal banar, kada ampih bila kada dapat,” ujar Zaleha bapander wayah satiap handak guringan.
“Bajuang itu harus diakali,” ujar Palui.
“Sampiyan handaklah baisian anak?” ujar bini Palui.
“Kawin itu tujuannya adalah baisian anak,” sahut Palui.
“Anak pamulaan ini apakah katuju lalakian atawa bibinian?” ujar bininya pina ungah.
“Lalakian atawa bibinian itu kita sarahakan wan nang di atas haja,” sahut Palui.
“Barapa ikung baiknya ka?” ujar bininya.
“Sasuai ajaran KB baiknya dua ikung haja,” ujar Palui.
“Dua ikung itu apakah lalakian kaduanya atawa bibinian kaduanya?” ujar bini Palui makin jelimut bapander.
“Sasuai KB, lalakian atawa bibinian sama haja,” ujar Palui.
“Ulun kira sual dua, tiga atawa ampat ikung itu kada parlu hawatir karna razakinya insya Allah ada haja,” ujar bininya makin layau panderannya.
“Tujuan hidup bakaluarga ini adalah sajahtera. Jadi sual jumlah tasarah haja nang panting asal kawa hidup sajahtera,” ujar Palui pina mulai muyak manyahuti.
“Kalu kaina anak kita itu ganal, baiknya jadi napa ka?” ujar bininya makin jauh membayangakan.
“Kukira tasarah jadi napa baik asal bibit dan bobotnya baik. Tapi kaya apa kita berencana handak macam-macam, handak dapat saikung haja balum ada bayangan karna bamamalaman dalam samingguan ini ikam layau bapander. Pabila jua wayah maulahnya kalu bapander tarus bamamalaman?” ujar Palui sarik karna inya makin mangantuk dan kadada bayangan mamulainya.
