Kisah Palui Balukup Samuturan (Gaya MotoGP)
Saling katujunya lawan MotoGP, hakun haja Palui manungkar sapida mutur ganal nang babungkuk kaya nang rancak dipakai bubuhan palatino rosi. Saban kalian kalu ada acara babalapan, pasti inya ada tarus manuntun. Sudahnya kalu ada siaran langsung di tv, pasti ditungguinya tu pang.
“Kanapa ikam jadi manungkar sapida mutur balarang-larang, Lui?” ujar Garbus batakun waktu Palui baelang ka rumahnya.
“Nang ngarannya hubi tu kada kawa diukur lawan duit, Bus ai,” ujar Palui. “Ampun ku ni kadada apa-apanya kalu dibandingakan lawan haraga sapida mutur Harli Dapatan . eh . Harley Davidson, maksutku. Kalu nang itu, baratusan tu pang jutanya . tapi banyak haja kalu urang nang baisian. Marganya itu tadi pang . sudah hubi, Bus ai.” ujar Palui pina musti manjalasakan.
“Bujurlah, Lui .. Jar urang, kandaraan kaya pun ikam ni burus minyaknya? Sualnya wayah ini haraga binsin sudah banaik kalu? Pacangan kada kaduitan jadinya.” Garbus batakun pulang.
“Kada kawa ai, Bus ai. Inya sudah ku hakuni pang … Jadi apa bulih bulat ai . iya kalu,” jar Palui sambil takarinyum.
Tumatan rumah Garbus, Palui kada langsung bulik ka rumah, tapi inya batarus ka luar kuta. Pas haratan lalajuannya .. malibas bis ampah ka Balikpapan mambalap. Palui takajut .. lalu inya marasa tapanasi. Dihaganya .. tapi sapida muturnya kalah laju, padahal sudah kada katanahan inya mambukahakan. Bis tadi tatap laju, jauh maninggalakannya.
“Hau . kanapa jadi bisa kaya ini? Dimapa iki?!” ujar Palui dalam hati.
“Uui. Iih lah .Aku musti babungkuk awak, supaya kada tapi ditampuh angin,” ujarnya lagi imbah ingat kayapa bubuhan motoGP rancak babalapan.
Lalu Palui balukup sampai muhanya parak tacium satang, sambil tarus mamulas gas. Sakalinya dasar bujuran … bis tadi kawa dibalapnya. Jadi bagantian, Palui pulang nang jauh di muka bis itu.
“Kada tahu lawan saurang supirnya tu rupanya,” ujar Palui bapandir saurangan kahimungan sambil tatap balukup.
Tapi, kada lawas imbah Palui bapandir kaya itu bis tadi sudah ada pulang di higanya handak mambalap. Palui kada mau bakalah, sapida muturnya tatap dibukahakannya salalajunya . awaknya masih tatap balukup. Tapi tatap haja inya atawa bis tu kadada nang kawa badahulunya batutulan tatap tapaimbai bahigaan.
Palui hiran, kanapa bisa jadi kaya itu. Lalu inya basilang. Paharatan masih lalajuannya Palui badiri di kajajakan sapida muturnya. Dijanguknya ka dalam bis nang masih laju jua di higanya. Ubuiii sakalinya supir, karnet wan panumpang dalam bis tu samuturan duduk sambil balukup, manuruti gaya Palui. Wusshhh tatinggal ai Palui jadinya .. apa mun sama pang gaya.
