Kisah Palui Bapintaan
LAWAS bagana di Banjarmasin pang Palui jadi banyak pangalaman nang dilihat wandirasakan. Ada sabulan lalu ka kuta dudul manziarahi kubur aruah mama abahnya, di desa Mangga Tiga sana. Kada singhaja Palui malihat bangunan panti asuhan hatapnya pina mirisan alias jabuk sudah bangunannya.
”Napa Lui ikam mampoto-poto bangunan panti asuhan gasan apa?” rawa Julak Ari, pangurus panti.
“Kada apa-apa, gasan dokumentasi haja, kalu pang kena di Banjarmasin, ada nang hakun mambantu,” sahut Palui tenang.
“Amun damintu silahkan poto-poto haja Lui ai, sampai berapa rulkah mengudak?” sidin lihum.
“Wayah ini kada pakai rol film lagi bakudak, tapi era digital julak ai,handak ratusan kalikah mampoto siap haja kamera ulun naya manampungnya,” Palui manjalasakan.
Himung Palui, karana ini piluang usaha nang kawa dijadiakan duit kenanya.
”Napa Lui lihum saurangan?” rawa Garbus nang lawas kada betamuan wan Palui.
“Aku tadi mampoto-poto keadaan panti asuhan di kampung kita naya, rencana handak aku tawarkan ka dunatur, muhun sumbangannya, supaya bangunan panti kita ini jadi bagus,” sahut Palui pina musti.
Maedarkan list Palui di Banjarmasin, kamana-mana terutama warga hulu sungai jua pang nang lawas bagana di Banjar. Di dalam proposal tertera duit nang cagar diparluakan sakian puluh juta, gasan mambangun asrama panti nang sudah jabuk nitu, disertakan Palui gambarnya, jadi urang parcaya banar bahwa panti bujur-bujur mamarluakan gasan nang dibangun nang refresentatif ,istilah ilmu bangunannya.
Baampat balima sudah ditamui Palui warga hulu sungai nang sugih, nang sudah jadi bos di Banjarmasin,sakalinya mangucur haja bantuan sidin-sidin nitu, sakira tujuh juta labih takumpulan. Ada nang mambantu sajuta, dua juta, ada nang labih, buhan sidin maras malihat bangunan panti jabuk. Karana marasa urang hulu sungai jua, kamana lagi bulik mun kada hulu sungai jua bila mati ditanam. Begitu pamikiran urang nang marasa matan hulu sungai naya.
Sakalinya Julak Ari mandapati Palui ka Banjarmasin.
”Uh Lui ikam kudangar ada bapintaan duit gasan panti, napa kadada manyatur ka pangurus panti ka pangurus panti?” takun sidin.
Takajut Palui nya.”Dimana pian tahu?” Palui piragah kada besalah.
“Ikam Lui ai bila kada mangaku aku lapur polisi!” ancam julak.
Mandangar pina gaduh nitu datang Tulamak manangahi. ”Bapadah ha Lui ai, ada bapintaan satangah bulan lalu ?” Tulamak manangahi.
“Inggih ada ai julak ai?” sahut Palui gamat.
“Barapa kulihannya, ayuha sapuluh persen gasan ikam?” ujar sidin.
“Kulihan 7,5 juta, sudah ulun tukarakan ka sapida mutur, tukar tambah wan sapida mutur buruk ulun nang buruk, supaya hanyar jua sapida mutur ulun julak ai?” Palui bisa bakilah.
“Kada kawa nah, nitu duit yatim, kena ikam kada baberkah mamakai duit yatim nitu,” sidin maancam.
“Jual Lui sapida muturnya, julung duitnya gasan panti nitu,” saran Tulamak.
Lakas Palui sapida muturnya ka pambalantikan gasan dijual duitnya dijulung ka panti asuhan , karana memang ada duit panti jua dipakainya? Jaka aparat nang manangkap, kadada ampun lagi, ditangkap ikam Lui ai, masuk panjara, untung ha julak Ari nang manangkap. Imbah dijulung duit bapintaan nitu selesai sudah urusan ikam.
Han jarku Lui ai, jangan lagilah kalakuan kaya naya? Julak Ari gagarunum.
