Kisah Palui – Hahu
Dunia oh dunia. Tuha bangka sudah dunia ini. Hahu-hahu kada karasaan parak sudah tahun baru 2018.
”Kada karasaan Bus ai habis bulan maulid, karing rakungan nah kadada nang basaruan lagi,” Palui pina marista.
“Uh Lui napa ikam? Makanannyakah nang diganang, kada hikmah maulidnyalah nang diasi?” sahut Garbus.
“Nitu aku Bus ai, katuju makannya nang diganang. Hikmah maulidnya bahanu hilang , bahanu marikit,” Palui pina kada marasa barsalah.
“Urang te hikmahnya maulid Lui ai nang dicari, jangan manyulum makanannya haja,” sahut Tulamak jua.
“Ayuha mudahan bulan maulid tahun kena aku kawa maamalakan hikmah maulidnya,” jawab Palui kada mau kalah.
Sampai Palui ka rumah lalu baucap ka bininya.”Hahu-hahu , tahun baru parak pulang kita. Artinya bakurang umur satahun. Jangan marasa rami tarus. Parlu introspeksi diri, banyak maksiatkah atau banyak baibadatkah kita naya, umanya ai? Kena bila sudah dikubur tahu banar apa artinya waktu, sadetik, dua detik, b0atapa waktu nitu bararti banar. Kalu wayah ne takurihing tarus mahabisakan waktu wan gawian maksiat. Gunakan waktu umanya ai gasan mancari sangu di akhirat!” Palui ka bini sarius banar.
“Hahu-hahu, ya hahu-hahu, istilah napa pulang abahnya?” sahut nang pina takulibi.
“Istilah latah haja umanya ai, manyikapi hidup wan kahidupan. Waktu tarus barlalu, bila kita kada hati-hati ya sudah, cagar digilas waktu diri kita. Urang rajin salat saurang kuler. Maukah pahalanya babagi dua, pasti kada hakun urang. Siapa nang rajin ia akan mamanen hasilnya, tapi siapa nang kuler ia akan marasakan akibatnya. Iyakah?” Palui berargumen di hadapan bini.
“Karana waktu jua nang maulah binian hakun mamakai jilbab, kamudian karana waktu jua binian hakun malapas hijab. Bulak-balik iblis mambisiki hati manusia supaya tagalincir. Siapakah urangnya, binian atau lakian kada pandang bulu. Nang alim bisa ampih jadi urang alim, nang maling bisa betaubat. Inya?” nang bini bisa jua berargumen.
“Nang panting mahadapi tahun 2018 ne, tahun pulitik umanya ai, tahun pilkada di Hulu Sungai Salatan naya. Kapala bulih panas tapi hati tatap dingin. Pilihan bulih berbeda, tapi tatap kita jaga parsatuan wan badangsanakan haja kita. Jangan bacakut papadaan karana berbeda bendera di muka rumah. Jangan hahu-hahu haja, harus diitihi bujur-bujur, siapa calonnya nang dipilih, kena manyasal badudi, tiada berguna lagi,” Palui bukah ka pulitik bapanderan ka bininya.
“Ayuha kita masing-masing haja mancoblos, kada bulih saling baungkai,” ucap nang bini. Tanganga Paluinya. “Mancoblos apa jar ikam?” Palui manyirit ka bininya.
“Mancoblos gambar paslon (pasangan calon) abahnya ai,” nang bini manarik ka laki mambawai masukan ka dalam kamar, tanda urang dua laki bini saling baakuran.
Himung si Pantul, eh si Palui.
Han jarku, nitu gunanya ada baisi bini, nyaman guring ada nang mangawani, Palui takurinyum haja sakalinya.
