Buka Tutup
Barakat rajin salat bajamaah ka masjid ada betamuan kawan lawas, hampir 15 tahun kada suah barjumpa. ”Kita takumpul di SMP Lui lah?” rawa lakian nang taimbai Palui.
“Ikam siapa ya?” Palui bingung.
“Aku Dandui, nang rajin maulu-ulu ikam bahari,” sahut Dandui.
“Bah iya pang Dandui lah, bujur nah?” Palui takajut, kaganangan inya sudah.
“Ni Garbuskah Lui?” sambat Dandui.
“Bujur ni Garbus, wayahni bisa baurutan nang lamah-lamah,” sahut Palui.
Karana Dandui ini urangnya pangawan jadi mambawa Palui ka Acil Masfah, parak masjid Al Minnah sana.
“Masihlah ikam jadi paman kantur?” takun Palui.
“Masih Lui ai, sapuluh tahun mahunur akhirnya aku diangkat pamarintah jua, jadi PNS paman kantur,” sahut Dandui asa himung.
“Barapa gajihnya Dui?” takun Garbus.
“Gajihnya sabulan 30 hari Bus ai,” sambat Dandui kada handak mamadahakan barapa gajihnya.
“Nang panting sajahtera, iya kada Dandui lah,” Palui malawanakan .
“Bujur Lui ai, nang panting kawa mahidupi anak bini, iya am sudah,” sahut Dandui.
“Apa tugas ikam Dui?” takun lagi Garbus.
“Tugaskukah mambuka manutup, babarasih di dalam wan di luar kantur,” ujar Dandui lagi.
“Napa nang ikam buka tutup nitu Dui?” Palui manakuni jua.
“Iya nang kubuka te lawang kantur, jendela kantur, bila baisukan kubuka, bila kamarian jam ampat kututup, kaya urang dua laki bini jua bila handak dibuka, bila kada handak ditutup dahulu,” sahut Dandui lihum.
“Apanya nang ikam maksud Dui?” Garbus piragah kada tahu.
“Silawar bini, bila handak kubuka, bila kada handak biar haja batutupan dahulu,” Dandui baampik mangalahakan Garbus.
“Han jarku napa ya marambat-rambat panderan ka sesuatu nang porno,” sahut Palui asa galianan.
“Nitu pang tugasku Lui ai, baisukan sampat jam 7 kubuka lawang kantur, babarasih aku di dalam maupun di halaman kantur, kena jam 4 kamarian kututup lawang kantur sambil babarasih pulang, kaya nitu pang gawian jadi paman kantur ni,” Dandui manjalasakan sarius.
“Kawalah ikam duduk di kursi kaya buhan pagawai nang lainnya?” takun Palui.
“Aku tahu diri Lui ai, bila duduk di kursi siapa nang batugas mambuka manutup lawang wan babarasih nitu?” sahut Dandui baalasan.
“Uh bujur Dui lah, bila kadada nang mambuka wan manutup lawang, pasti ngalih buhan pagawai masuk ka kantur nitu, bila sahari atau dua hari kada turun pasti karasaan, siapa nang mambuka wan manutup lawang kantur wan babarasih, babasuh piring wan sabagainya, inya gin banyak dicuntan maling barang di kantur bila kada ditutup lawang kantur sampai malam hari, pasti kaya nitu Dui ai,” Palui bijaksana.
“Bujur Lui ai, sahari gin aku kada turun, dicari banar ulih kapala kanturnya,” ujar Dandui himung.
“Bujur Dui ai, peran paman kantur begitu strategis jua, iya kalu,” Palui lihum bisa maambung ka Dandui.
Lakas inya mambayari makanan nang sudah habis dimakani buhannya nitu.
