Kisah Sudah Biasa Jua
Wayah ini masih mambujang Palui katuju banar baulanja di luar. Rasanya kadada pang wadah lokalisasi nang kada parnah didatanginya, mulai nang ada di Banjar sampai nang di luar kuta sana, sudah inya rasani samunyaan. Mulai bibinian nang anum sampai nang tuha, nang kurus sampai nang lamak mungkal inya hantup jua.
Rupanya karna kabiasaannya batukar di luar itulah makanya sampai umur parak maniga puluh inya baluman bapikiran handak bakawan. Padahal kakawalannya nangkaya Garbus, Tulamak, wan si Tuhirang mulai balanjaan babanyakan anak. “Nyaman bujangan jua wal ai, kamana-mana kadada nang manangati, kadada nang maranguti. Amun handak tinggal manukar, tinggal babayar habis kesah. Tasarah handak bibinian nang mana tinggal tunjuk,” ujar Palui wayah dihuluti kakawalannya.
Kada lawas tadi, Palui malihat bibinian urang kampung subarang, ngarannya si Leha. Rupanya imbah malihat itu Palui rasa karindangan banar. Imbah disalidiki sakalinya si Leha itu kamanakannya julak Ambrun nang kada lain kawal mamarinanya jua wayah dahulu sama-sama jadi pajuang. Langsung ai inya bulik bapadah wan mamarinanya, minta dipatuhakan wan si Leha nang lamak mungkal, putih mangkining itu.
“Ayu ai kalu hati ikam sudah mat wan bujuran handak baubah Lui ai. Sual julak Ambrun hakun atawa kada kaina aku maurusnya,” ujar mamarinanya.
Sakalinya tulus jua kahandak Palui handak babini. Julak Ambrun akur haja, karna sidin rupanya sudah lawas handak malakiakan si Leha kamanakannya itu. Wayah bapapatuhan rupanya si Lehanya hakun jua. Kada lawas habis baurusan bubuhan urang tuha, akhirnya hari gasan bakawinan ditantukan, yaitu hari Ahad bulan kaina. Samunyaan parsiapan digawi bubuhan kaluarga Palui wan kaluarga si Leha.
Pas harinya, acara kawinan dirayakan sadarhana haja di rumah si Leha. Seharian Palui wan Leha duduk di petataian nangkaya urang dipamerakan. Rasa ringkut awak Palui satatumat baduduk, satatumat badiri mambalasi sasalaman urang. “Asa karing gigi, haur jihi wan tamu nang datang,” ujar Palui gagarunum saurang.
Malamnya Palui langsung bakumpul wan si Leha. Tapi nang ngarannya kabiasaan batukar, rupanya ngalih Palui mahilangakan kabiasaannya itu. Jadi pas imbah bekumpulan wan si Leha itu rupanya Palui kalumpanan, inya mambuka dompet langsung manjulungi si Leha duit haraga lima puluh ribu.
Si Leha rupanya kada sadar jua, inya tarima haja duit julungan Palui tadi. “Makasih lah, ini nah angsulannya,” ujar Leha sambil manjulung duit ka Palui.
“Oooo… ikam sekalinya bibinian kaya itu jua kah?” ujar Palui hanyar sadar. Si Palui tapakalah saurang, sekalinya bininya itu sudah biasa jua dipakai urang, makanya imbah dijulungi duit limapuluh ribu, langsung inya ma-angsul Rp20 ribu.
