isah Si Palui Naik Boeing
PALUI sudah lawas mandangar bahwa inya ada baisian kaluarga di Samarinda. Usut punya usut tanyata kada di Samarindanya, tapi jauh di padalaman Tenggarong. Ujar kisah kaluarganya itu madam ka sana wayah lagi anum, wayah itu masih rami batabang kayu dan sampai babini baranak balum biasa bulik.
Bubuhannya takajut banar karna mandapat kabar bahwa hari ini cagar bulik ka banua mailangi kaluarga.
“Ikam patuhlah Lui wan Salimi itu?” ujar Garbus manakuni kamanakan Palui nang cagar datang itu.
“Bujur haja kamanakan diujud, kamanakan banar tapi sudah lawas banar kami bapisah, lawian tahun dan inya kada biasa bulik-bulik ka banua,” ujar Palui.
“Kalu bubuhan kita madam ka banua urang dan lawian tahun kada bulik, lalu bahabar handak bulik pasti sudah nyaman hidupnya,” ujar Garbus.
“Bujur Bus ai, kaya itu jua aku dahulu wayah madam ka banua urang, kada cagar bulik kalu balum bahasil. Karna kalu bulik wayah sakit, pasti supan wan kakawalan,” ujar Palui.
“Pabila buliknya Lui?” ujar Garbus batakun.
“Biniku mamadahakan bahwa buliknya naik Boeing, ayu isuk kita barumbungan manyiwa dua talu buah mutur ka lapangan tarbang barami-rami manyambutnya. Aku sudah manilpun lapangan tarbang bahwa isuk siang ada pasawat Boeing. Apalagi aku sudah dandaman banar,” ujar Palui mambawai kakawalannya.
Sasuai nang dijanjiakan, bubuhannya tulakan ka lapangan tarbang, barumbungan kaya maantar atawa manyambut urang haji. Sampai di lapangan, bajam-jam mahadang balum batamuan jua wan kaluarganya itu. Wayah pasawat Boeing itu datang, tunggal ikungan di-itihinya kadada jua kalihatan si Salimi nang dihadang-hadangnya. Sudah jua ditakunakan ka luketnya tanyata kadada panumpang nang bangaran Salimi ataupun anak bininya.
Karena sudah batangah hari manunggu, pasawat nang datang sudah habis, Palui bulikan lawan rumbungannya.
“Aku taumpat kaciwa Lui ai, kita dikaramputinya bahwa inya handak bulik sakaluargaan. Nyatanya pada hari nang sudah dipastiakan, bauyuh-uyuh kita mahadangi di lapangan, nyatanya inya kada datang,” ujar Garbus.
“Aku kaciwa jua Bus ai, tapi mungkin inya ada halangan, mungkin kahabisan tiket, mungkin tatinggal pesawat atawa ada halangan lain. Ayu kita bulikan haja, kaina kutilpun pulang,” ujar Palui mambawai kakawalannya. Sapanjang jalan bubuhannya manggarunum kaciwa dan manyumpah-nyumpah, pina musti minta disambut sakalinya tasambut buah bungur.
Wayah sampai di rumah, bubuhannya takajut karna banyak banar urang bagarumbung, Palui wan kakawalannya mangira pasti ada kajadian, kanapa maka banyak urang di rumahnya.
“Ada apa, ada apaaa …,” ujar Palui bakuriak. Lalu Palui masuk ka rumah dan takajut banar malihat kamanakannya Salimi sakaluargaan sudah ada di rumah, Palui maragap dan batatangisan karna karinduan.
“Kami ka lapangan manyambut ikam karna ikam bapadah naik pasawat Boeing, sakalinya ikam sudah ada di rumah?” ujar Palui kasukaan.
“Hi’ih, kami naik Boeing, kami naik mutur bis bangaran Boeing wayah parak magrib tulak matan Balikpapan dan baisukan tadi sampai ka sini,” ujar Salimi bakisah lalu maragap Palui.
“Ooo … mutur bis Boeing-kah, kukira kapal tarbang Boeing nang mambawa urang haji itu?” ujar Palui kakalahan.
