Kisah Palui Pina Musti
Kada karasaan piala dunia satumat haja lagi. Wayahini haja urang sudah rami mamandirakan. Tamasuk buhan Palui sapakawalan nang rami mamandirakan sual main bal tu.
Saban takumpul sambil mahirup kupi di warung Acil Isul, nang dipandirakan kada lain pada sual main bal. Asing-asingnya malawanakan pamain masing-masing.
“Amun aku kada lain pada umpat Inggris. Pamainnya harat-harat. Nyata dah Inggris juaranya. Makanya aku umpat Inggris,” ujar Tuhirang mambuka pandir.
Garbus nang rahat manyaruput kupi di pipiringan, langsung manyahuti. Pipiringan baisi banyu kupi langsung diandaknya ka mija. “Kadada harapan Inggris manang. Ampun ku nang nyata juara tahun ini. Aku tahun ini umpat Barasil pulang. Inggris tu kadada apa-apanya,” ujar Garbus pina musti banar.
Mandangar kawalnya bahual kada karuan tampuh, Tulamak kada tahan jua. Sakampungan urang tahu, lamun sual main bal Tulamak matan bahari katuju banar lawan Belanda.
Makanya, rahat kakawalannya bahual, Tulamak umpat jua mahinggur. “Jangan salah buhan ikam. Tahun ini aku umpat Belanda pulang. Nyata Belanda tahun ini juaranya. Wani sing apa-an nah,” ujar Tumalak mangancang. Pina kancang ha urat gulunya.
Walhasil, batiga bakawal tu bacakut sual main bal. Tatinggal Palui haja lagi nang kada sing pandiran. Kaya kadada sumangat sama sakali. Tagal Palui tu pina kurihing-kurihing haja malihat kakawalannya bacakut.
“Cah, buhan ikam ni kaya kananakan haja lagi,” ujar Palui mamulai pandir.
“Nangapa maksud ikam Lui? Ikam umpat mana garang. Kami nyata sudah ada nang diumpati,” Tulamak manyambat.
Palui tatap ai kurihing-kurihing saurangan. “Buhan ikam tu pina musti banar samunyaan. Handak umpat Inggris, umpat Barasil wan umpat Belanda. Dibawa buhannya garang? Di kampung haja kada dibawa urang main bal,” ujar Palui kalakak-kalakak tatawa.
Masam muha kakawalan Palui mandangar sindiran tu.
Kadanya kaya itu pang Lui ai, ujar Garbus manyambat. Maksud kami tu ikam malawanakan siapa di piala dunia ni. Kaya aku malawanakan Barasil supaya manang.
“Ham, malalain pulang kalu. Kaya bakalahi haja dilawanakan. Kada usah dilawanakan gin bisa ai buhannya main,” ujar Palui pulang, makin galak inya tatawa.
“Dasar ngalih bapandir lawan urang nang limpat pintar ni. Kada usah dihirani inya, kita haja bapandiran,” ujar Tuhirang tapakalah.
