Kisah Palui Mamatak Paku
Barakat cangkal bacari Palui kawa jua sadikit-sadikit mambaiki rumahnya. Tukangnya kada jauh-jauh mancari, bubuhan kakawalnnya jua si Tukacil nang sudah bapanglaman batukang puluhan tahun. Bila Tukacil bagawi, inya pasti mambawa tuhirang gasan mangganiinya. Imbah tuntung barikin upah burungan, bubuhannya langsung bagawian mambaiki rumah Palui.
“Amun ada kakurangan, padahi aku lah Cil, Rang. Nayaman aku manukar ka pasar,” ujar Palui mamadahi bubuhannya.
“Paku seng lawan paku reeng kurang Lui ai, mun kawa manukar sakilo dahulu,” ujar Tuhirang manyahuti.
“Gampang mun urusan paku, hadangiai dahulu aku ka pasar,” ujar Palui lalu tulak manuju pasar.
Di tangah jalan Palui tatamu Garbus wan Tulamak.
“Handak kamana Lui pina mangincang,” ujar Tulamak managur.
“Aku handak ka pasar manukar paku.” Uma ai satumatnya habis? Padahal samalam ikam manukar talu kiloan,” ujar Garbus.
“Iya am, gawian bubuhan Tukacil wan Tuhirang katuju mamataki pakuku, makanya habis tarus,” ujar Palui.
“Hau, Kanapa ikam lihatakan Lui si Tukacil mamatak paku ikam?” ujar garbus takajut.
“Kada itu haja Bus ai. Papanku nang baik-baik ditatakinya bahimat,” ujar Palui.
“Kanapa kada ditagur atawa ikam ampihi Tukacil wan Tuhirang tu? Baarti bubuhannya itu kada kawa dipacaya lagi batukangan,” ujar Tulamak umpat sarik
“Ngalih aku managur Mak ai, kada kawa aku maampihi buhannya bagawi, labaram kada tuntung rumahku,” ujar Palui
“Ikam dasar baik hati Lui ai, tukang mamatak paku lawan manatak kayu papan ikam lihatakan. Dasar baik hati,” ujar Garbus ranai malihat Palui kaya itu
“Bubuhan ikam jangan dipropokatori Palui Mak ai, Bus ai. Gawianku dasar mamatak paku wan manatak
“kayu atawa papan nang baik. Amun kada kaya itu kada tuntung rumah Palui,” ujar Tukacil mancungul.
“Ikam pabila manukar paku nya Lui? Labih sajam kami mahadang,” ujar Tuhirang jua kasarikan manunggu Palui
“Ha…ha… Bubuhannya tadi pang mahual aku, paksa ai aku basinggah,” ujar Palui lihum langsung bagagas tulak.
“Nang mahual tu ikam, mantang-mantang kami kada pamahaman,” ujar garbus wan tulamak kakalahan limbah tahu gawian tukang dasar mamatak paku.
