WAYAH kapalipitan Garbus mandatangi rumah Tulamak, maksudnya handak bahutang duit.
“Ikam itu Mak ai baiknya banyaki bajalan,” ujar Garbus.
“Hau kanapa maka ikam manyuruh aku banyak bajalan, padahal bajalan itu sudah jadi gawianku. Ka pasar balang bulik bajalan, ka masigit bajalan, mahadiri partamuan di kalurahan bajalan dan saban baisukan aku bajalan jua,” ujar Tulamak.
“Kalu ikam rajin bajalan ba-arti kada parlu manukar sapida mutur. Makanya tabungan ikam nang handak manukar sapida mutur itu kalu bisa kuinjam satumat, sedangkan ikam Mak ai baiknya manukar sapida haja,” ujar Garbus.
“Ooo… itukah maksudnya Bus? Manyuruh aku bajalan itu supaya aku kada jadi manukar sapida mutur?” ujar Tulamak hanyar tahu maksud ucapan Garbus tadi.
“Aku hanya manyaranakan haja Mak ai, kada mamaksa tapi kalu ikam hakun yaaa… tarima kasih,” ujar Garbus.
“Napa pina rami mamander sapida mutur Bus?” ujar Palui.
“Garbus mambujuki aku supaya kada jadi manukar sapida mutur, lalu duit tabunganku handak di-injamnya lalu aku disuruhnya manukar sapida haja,” ujar Tulamak bakisah.
“Sapida itu sama wan baulah raga Mak ai. Kanapa maka kuanggap sama wan baulahraga karna bisa mangaluarakan paluh jua,” ujar Garbus.
“Cuba takuni Palui Bus, kalu basapida itu sama wan baulahraga maka katujulah inya manukar sapida?” ujar Tulamak.
“Kalu ada duitnya, jangankan sapida atawa sapida mutur malah aku hakun manukar mutur,” ujar Palui ba-agak.
“Bujurkah Lui?” ujar Garbus.
“Tadi sudah kusambat kalau… wan andaikata ada duitnya. Tapi kalu disuruh mamilih apakah katuju sapida mutur atawa sapida, maka pasti kujawab bahwa aku mamilih sapi,” ujar Palui tatawa.
“Jawaban ikam ini Lui ai adalah jawaban mahuhulut. Lain nang disurung lain nang dijawab,” ujar Tulamak manumpalak.
“Jawabanku itu sudah kupikirakan masak-masak,” sahut Palui.
“Napa alasannya maka ikam mamilih sapi Lui?” ujar Garbus.
“Kalu aku mamilih sapi, pasti aku cagar dipadahakan urang pintar wan harat karna sapi itu susunya kawa dijual atawa gasan dimakan. Tapi sabaiknya pasti aku dipadahakan urang bubungulan bila mamarah sapida karna sapida jalas-jalas kadada susunya,” ujar Palui lihum mangalahakan Tulamak wan Garbus. (rep/emh)
